A Xunta reformula o programa de vivendas baleiras para ofertar fogares nos concellos con maior demanda e dar seguridade aos propietarios

A Xunta reformulou o programa de vivendas baleiras para ofertar fogares nos concellos con maior demanda, sobre todo nas grandes cidades, e dar seguridade xurídica aos propietarios.

Así o avanzou esta tarde a conselleira de Medio Ambiente, Territorio e Vivenda, Ángeles Vázquez, que respondeu unha interpelación no Pleno na que sinalou que a principal novidade deste programa é que será de xestión directa da Xunta, pero isto “non implica que se faga de costas ao sector ou que non se conte coa colaboración dos concellos”.

“Todo o contrario, precisamos a colaboración das administracións locais”, asegurou, insistindo en que sobre todo as sete cidades, onde se rexistra maior demanda e onde hai maior número destes inmobles, deben implicarse de forma directa no programa.

A Xunta xa ten pechado esta iniciativa, que ofrece garantías xurídicas para os propietarios —como os seguros de pago do alugueiro e de multirrisco fogar—, así como axudas para mellorar os inmobles, que poden chegar aos 8.000 euros, “o dobre das que prevé o Estado no borrador do seu programa”.

Sobre isto último, Ángeles Vázquez sinalou que “Galicia non pode esperar máis” polo programa que o Goberno quere introducir no Plan estatal de vivenda. Así mesmo, insistiu na necesidade de que o Executivo central defina con claridade este concepto.

A conselleira tamén apuntou que o programa da Xunta está recollido no Pacto social pola vivenda 2021-2025, elaborado no marco do Observatorio da Vivenda no que están representados todos os axentes, desde os promotores e construtores ata os técnicos.

Nesta liña, lembrou que o Pacto recolle outras medidas que teñen acadado moi bos resultados e que continuarán en 2022. Fixo referencia, en concreto, a tres liñas convocadas en 2021 por un importe de case 2 millóns de euros, cuxo crédito se esgotou: axudas para a adquisición de vivenda en cascos históricos (65 axudas), compra de vivenda en concellos de menos de 5.000 habitantes (112 axudas) e adquisición de vivendas de protección autonómica (40 axudas).