A Xunta promove con Fegatur catro 'fam trips' para reactivar o turismo rural arredor das rutas xacobeas

A directora de Turismo de Galicia, Nava Castro, e o presidente do Clúster Turismo de Galicia, Cesáreo Pardal, participaron hoxe nun encontro de traballo entre casas de turismo rural e axencias de viaxe

Promovéronse encontros de traballo e viaxes de familiarización arredor de catro dos itinerarios do Camiño de Santiago co obxectivo de mellorar a comercialización do turismo rural galego

Grazas a estas experiencias e á colaboración público-privada búscase crear novos paquetes turísticos e mellorar a desestacionalización do turismo rural galego

Muxía (A Coruña), 1 de decembro de 2021

Co obxectivo de crear novos paquetes turísticos e mellorar a comercialización da oferta do turismo rural no marco da celebración deste Xacobeo 21-22, Turismo de Galicia e a Federación Galega de Turismo Rural (FEGATUR) promoveron este mes catro viaxes de familiarización e workshops que rematan esta semana e nos que participaron preto de 60 turoperadores e máis de 30 casas de turismo rural.

A directora de Turismo de Galicia, Nava Castro, participou esta tarde en Muxía xunto co presidente do Clúster Turismo de Galicia, Cesáreo Pardal, nun destes últimos encontros de traballo, que rematan este venres. Nava Castro destacou a necesidade de promover este tipo de iniciativas público-privadas para “explorar novos públicos e novos territorios e favorecer sinerxías entre ambos segmentos, turoperación e turismo rural, co Camiño de Santiago como elemento vertebrador”.

A iniciativa permitiu aos axentes de viaxes facer diferentes tramos de catro dos itinerarios do Camiño de Santiago así como coñecer os principais recursos turísticos de máis dunha ducia de concellos situados arredor destes itinerarios. De feito, as rutas xacobeas foron o piar sobre o que se crearon estas viaxes de familiarización, que se están a desenvolver arredor dos Camiños de Inverno, Camiño Mozárabe- Vía da Prata e Camiño de Fisterra-Muxía.

Comercialización e desestacionalización

Con todas estas experiencias búscase crear paquetes turísticos que combinen turismo rural e gastronomía de xeito atractivo, definindo novas estratexias de comercialización ao tempo que se avanza na desestacionalización deste tipo de turismo e se mellora o grao de coñecemento dos axentes de viaxes arredor da oferta turística rural coa que conta Galicia, que é o obxectivo co que a Xunta impulsou esta colaboración con FEGATUR.

O obxectivo final é propiciar intercambios comerciais e de experiencias que teñen na singularidade do rural, nas paisaxes e no patrimonio os seus principios de actuación, buscando seguir a adaptando do turismo rural galego ás necesidades dos novos viaxeiros poscovid.

O Goberno galego continúa ofrecendo así o seu apoio ao conxunto do sector turístico galego, e nomeadamente a segmentos coma o turismo rural, a través da posta en marcha conxunta de iniciativas coma esta, enmarcada no plan de choque posta en marcha pola Xunta de Galicia para a recuperación e reactivación do sector turístico galego e que xa supuxo un investimento de máis de 120 millóns de euros no sector.