Feijóo refírese a Galicia como exemplo do reformismo tranquilo, “motor de cambio imparable durante estas catro décadas”

O presidente da Xunta, Alberto Núñez Feijóo, referiuse hoxe a Galicia como un exemplo do reformismo tranquilo, “motor de cambio imparable durante estas catro décadas”.

“A Galicia europea superou o mito do atraso. A Galicia Constitucional desatendeu as tentacións populistas e divisorias doutros territorios para centrar os seus esforzos nun desenvolvemento económico, social e institucional. E a Galicia autonómica logrou pasar de ser unha terra de emigrantes a unha terra de acollida e retorno”, recordou, durante a súa participación no acto de inauguración da XXVI Reunión Plenaria da Fundación Círculo de Montevideo: el mundo en pandemia.

Ao longo da súa intervención, na que fixo referencia a algunhas das cuestións obxecto de debate destas xornadas, Feijóo salientou que a Covid-19 foi o maior desafío ao que nos enfrontamos na época recente, poñendo a proba a gobernanza de todos os países. Foi un test de estrés dos servizos sanitarios, dos sistemas de atención social e da capacidade de apoio aos sectores máis afectados polas restricións; tensou as costuras de todas as economías, e deixou en evidencia as fraxilidades e fortalezas dunhas empresas que, dun día para outro, viron como o paradigma no que vivíamos se derrubaba.

Así mesmo, resaltou que o mundo actual afronta mudanzas inaprazables, como a necesaria transformación dos modelos produtivos. “Camiñamos cara a economías máis verdes, máis dixitais e sostibles”, precisou, facendo fincapé na necesidade dunha transición xusta, “sen precipitarnos nos tempos das reformas e sen deixar miles de postos de traballo polo camiño”. “A transición só será xusta se é respectuosa coas economías tradicionais e chega acompasada aos tempos nos que se produce”, matizou.

Nesta mesma liña, recoñeceu que asumir que a Covid chegou para quedarse máis tempo do que cabía esperar, impacta directamente sobre o deseño dos sistemas de saúde e de atención social e, por tanto, nas necesidades de investimento público e nas prioridades de gasto dos próximos anos.

Diante dos novos paradigmas, o presidente da Xunta avogou tamén pola adaptación dos modelos de gobernanza. “Debemos saber aproveitar as oportunidades que nos brinda o futuro, aínda que sexa incerto”, sentenciou, subliñando que a Administración debe ser un axente facilitador dos cambios económicos, da captación de investimentos e da creación de valor engadido.

“Esa é a clave para recuperarnos do golpe que vivimos nestes meses. Ademais de acompañar aos cidadáns, respondendo ás súas necesidades dun modo máis eficiente”, engadiu.

O presidente da Xunta concluíu destacando a utilidade da celebración de foros coma este para, a través da análise sosegada e da reflexión, axudar a construír un futuro de progreso, xustiza e liberdade.