A Xunta apoia a promoción da nosa comunidade como destino ideal para as familias coa nova campaña de “Galicia destino familiar”

Co obxectivo de seguir posicionando a Galicia como destino ideal para as familias, a directora de Turismo de Galicia, Nava Castro, participou esta mañá na presentación da nova campaña de promoción do selo turístico Galicia Destino Familiar, impulsado polo Clúster Turismo de Galicia, e que permitirá difundir esta oferta turística especializada nos mercados de proximidade de España e Portugal.
Tal e como destacou na súa intervención a directora de Turismo de Galicia, “campañas coma esta que se difundirá en medios dixitais en cidades próximas a Galicia tanto de España como do norte de Portugal, permiten visualizar Galicia como un destino adaptado ás necesidades dunha familia que quere descansar, gozar da paisaxe, dos nosos recursos turísticos con aloxamentos e oferta turística que se adaptan ás súas demandas”.
A iniciativa busca seguir avanzando no proceso de recuperación do sector turístico ao tempo que se destaca unha oferta que encaixa perfectamente coas necesidades do viaxeiro pospandemia, que segue optando maioritariamente por desprazamentos nun radio próximo e en vehículo propio, apostando por destinos turísticos seguros, tranquilos e non masificados, “características que encaixan á perfección co que ofrece Galicia”, explicou Nava Castro.
A directora de Turismo de Galicia destacou que a aposta polo turismo familiar é transversal para o Goberno galego xa que “buscamos adaptar outros produtos turísticos ás necesidades destes viaxeiros, como pode ser, por exemplo, o caso do Camiño de Santiago, que tamén queremos que sexa cada vez en maior medida, familiar”.
Selo turístico
Galicia Destino Familiar é unha iniciativa impulsada en 2016 polo Clúster Turismo de Galicia en colaboración co Goberno galego que permitiu crear un selo turístico no que se aglutinara toda a oferta turística de aloxamento e de oferta complementaria orientada ao turismo familiar. A marca acredita aloxamentos, empresas de restauración, axencias de viaxe e todo tipo de actividades turísticas enfocadas ás familias e situadas exclusivamente en territorio galego.
A oferta aglutínase nunha plataforma web e promociónase a través das redes sociais e, agora tamén, a través desta campaña co obxectivo de mellorar a comercialización desta oferta especializada.