Galicia ve clave avanzar no recoñecemento do rol feminino no mundo do mar con normativas que atendan as súas necesidades

Santiago de Compostela, 28 de outubro de 2021.- A directora xeral de Desenvolvemento Pesqueiro, Susana Rodríguez, destacou hoxe a necesidade de avanzar en normativas que atendan as necesidades da muller no mundo laboral vencellado co mar. Así o sinalou durante unha xornada de igualdade de xénero no ámbito marítimo organizada polo Parlamento Europeo no marco da iniciativa Semana europea da igualdade de xénero, na que a directora xeral participou por videoconferencia.
Neste sentido, Susana Rodríguez destacou a regulación específica do marisqueo a pé de Galicia, que desde o 2011 recolle aspectos orientados ao benestar das mulleres na profesión, como a suspensión do permiso de da actividade para a conciliación da vida laboral e familiar ou en casos de violencia de xénero. Estes apoios, subliñou, son clave para o avance na profesionalización das actividades vencelladas co mar que son maioritariamente femininas.
Nesta liña, puxo como exemplo os casos das mariscadoras a pé e das redeiras e salientou a contribución do asociacionismo e da Administración autonómica ao seu recoñecemento profesional co obxectivo de que estas profesionais puidesen optar a beneficios como as axudas públicas.
A formación é outra das ferramentas que destacou Susana Rodríguez para o reforzo da profesionalización. Neste ámbito puxo en valor a rede de escolas de Galicia que imparte formación relacionada coas profesións ligadas ao mar.
A maiores, a directora xeral aproveitou a ocasión para solicitar o apoio das institucións europeas dedicadas ao mar para que o traballo das mulleres no ámbito marítimo-pesqueiro teña o seu recoñecemento.

Presenza feminina

Durante a súa intervención, Susana Rodríguez tamén fixo fincapé no peso de Galicia como primeira rexión pesqueira de Europa e subliñou a notable presenza feminina en distintas áreas. Entre elas no marisqueo a pé, onde dos arredor de 3.700 profesionais máis do 70% son mulleres e no eido dos cultivos mariños, no que máis de 1.100 mulleres representan máis do 20% da ocupación neste ámbito. Tamén destacou a importante presenza feminina na industria da conserva e o conxelado de produtos do mar, na que máis do 70% dos empregos están ocupados por mulleres.
En relación á pesca, Susana Rodríguez explicou que en Galicia son preto de 500 as profesionais que traballan como tripulantes de buques de pesca, o que supón algo máis do 4% do sector. Malia esta menor presenza da muller nesta área, expuxo a directora xeral, as cifras de ocupación feminina aumentaron e fixo fincapé na necesidade de seguir traballando para visibilizar o papel da muller neste campo e afrontar o reto da remuda xeracional.