A Xunta realizará mañá un simulacro de activación do Plan de Emerxencia Exterior das instalacións da empresa Foresa no porto de Vilagarcía

A Xunta, en colaboración coa empresa Foresa, a Autoridade Portuaria do Porto e o Concello de Vilagarcía, realizará mañá un simulacro de activación do Plan de Emerxencia Exterior das instalacións que ten a empresa no porto. Con esta actuación pretendese probar a coordinación de todas as entidades nas actuacións a desenvolver en caso de emerxencia real co obxectivo de garantir unha rápida resolución.
No simulacro simularase un verquido de metanol pola rotura do brazo de carga dun camión cisterna e participarán preto de 30 persoas. Ademáis de persoal da empresa, da Dirección xeral de Emerxencias e Interior e da Autoridade Portuaria, está prevista a mobilización de efectivos do Servizo de Prevención e Extinción de Incendios e Salvamento do Consorcio de Pontevedra, Policía Portuaria, Policía Local, Garda Civil e do Servizo Municipal de Protección Civil do Concello de Vilagarcía.

Máis aló dunha maior presenza de medios de emerxencias na zona e os controis establecidos nas inmediacións do porto, non se prevé que se vexa afectado o normal desenvolvemento das actividades das empresas da contorna. No obstante, nos centros de traballo máis próximos ás instalacións de Foresa procederase a confinar de forma simultánea aos traballadores.

A Xunta destaca a importancia da aposta pola prevención como mellor ferramenta de resposta ante as posibles emerxencias.