A directora xeral de Xuventude, Participación e Voluntariado, Cristina Pichel, presentou esta nova iniciativa no albergue As Sinas
A Xunta de Galicia pon en marcha o Outono Xove con 1100 prazas para a mocidade e actividades de formación e lecer as fins de semana do último trimestre do ano
Ofértanse oito programas diferentes que se desenvolverán noutras tantas instalacións da Administración autonómica
Os grupos de participación dividiranse en dous tramos de idade: de 14 a 17 anos e de 18 a 30 anos
Xa está aberto o prazo de inscrición para todas as actividades, cuxas prazas se irán cubrindo por orde de chegada das solicitudes
A Xunta de Galicia pon en marcha o novo programa Outono Xove con 1100 prazas para que mocidade galega desfrute nas fins de semana de outubro, novembro e decembro de actividades formativas e de lecer nos albergues xuvenís da Administración autonómica. Esta nova iniciativa presentouna a directora xeral de Xuventude, Participación e Voluntariado, Cristina Pichel, no albergue As Sinas, que será unha das oito instalacións que acollerá estas propostas.
Cristina Pichel avanzou que esta nova iniciativa conta cun amplo catálogo de actividades que se vertebra en oito programas diferentes que se desenvolverán noutras tantas instalacións. Ademais explicou que se dividirán os participantes en dous tramos de idade, un de 14 a 17 anos e outro grupo de 18 a 30 anos.
Instalacións e programas
Outono Xove desenvolverase en albergues e campamentos xuvenís, así como na Residencia de Tempo Libre do Carballiño. En cada unha destas instalacións da rede autonómica ofrecerase un máximo de sete quendas entre os meses de outubro e decembro.
O Albergue Xuvenil de Gandarío celebrará o programa Unha finde de lenda; o albergue Mariña Española de Sada acollerá Cine rally, coa creación audiovisual como protagonista; os participantes que acudan ao das Sinas desfrutarán da iniciativa Amar_Xuventude, desde unha perspectiva medioambiental; o Campamento Xuvenil de Pontemaril, en Forcarei, achegará a astronomía á mocidade con Ceos de Música e tradición.
Pola súa banda, o albergue xuvenil Benigno Quiroga, de Portomarín, acollerá o programa Facendo Camiño; o Lug2 de Lugo poñerá a tecnoloxía ao alcance da xuventude con Aventura lug 2.0; a residencia de Tempo Libre do Carballiño acollerá Naturaleza; e o Campamento A Devesa de Ribadeo albergará Mar e cultura na Mariña.
O programa inclúe aloxamento en albergue xuvenil ou residencia de tempo libre, polo que se achega manutención completa desde a noite do venres ata o domingo pola mañá. A cota de participación será de 25 euros. Por ser membro de familia numerosa ou monoparental e por ser titular do Carné Xove, sempre e cando a tarxeta estea debidamente activada, aplicarase un desconto do 25% sobre o prezo.