A Xunta adxudica por preto de 90.000 € a redacción de dous proxectos construtivos para reducir o risco de inundacións no río Anllóns en Carballo

  A Consellería de Infraestruturas e Mobilidade, a través de Augas de Galicia, adxudicou por preto de 90.000 euros a redacción de dous proxectos construtivos para o desenvolvemento das actuacións necesarias para reducir o risco de inundacións no río Anllóns en Carballo.

Concretamente, os contratos adxudicados refírense á redacción do proxecto construtivo para a remodelación da ponte da rúa Fomento, coa remodelación da canle e motas de contención augas abaixo da ponte; e do proxecto de demolición da ponte de San Martiño e da nova ponte da rúa Deza á rúa San Xoán Bautista.

Estes dous contratos foron adxudicados á empresa Ingeniería do Noroeste S.L. Os traballos contan cun prazo para a elaboración dos proxectos de 3 meses, respectivamente.

Augas de Galicia segue, ademais, avanzando na contratación da redacción do proxecto construtivo para a demolición de edificación, remodelación da ponte e creación dunha canle de augas altas na rúa Sol.

A entidade hidráulica da Xunta ten xa contratada a redacción dos outros tres proxectos, na canle de desaugadoiro, na zona de Muíño do Quinto; de remodelación integral do parque de San Martiño; e para acometer a mellora hidráulica do río Anllóns ao seu paso polo enlace entre a AG-55, na rúa de A Cepeira, en Sísamo, que completan as actuacións previstas de cara a minimizar o risco de inundacións no río Anllóns ao seu paso por Carballo.

Plan de xestión da área de risco de inundación do río Anllóns

Trátase de actuacións que está a impulsar o departamento que dirixe Ethel Vázquez, no marco do convenio de colaboración asinado co Concello de Carballo para desenvolver os proxectos construtivos e a execución das obras identificadas como prioritarias no plan de xestión específico da área de risco potencial significativo de inundación do río Anllóns, que suporán un investimento global de 3 millóns de euros.

Segundo ese acordo, a Xunta asume integramente o investimento destas actuacións, contando co cofinanciamento dos Fondos Feder 2014/2020. Augas de Galicia levará a cabo a contratación da redacción e aprobación dos proxectos das intervencións e a execución das obras.

Pola súa banda, o Concello porá á disposición os terreos necesarios para o inicio das obras e realizará as xestións para posibilitar a súa execución. Tamén recibirá as obras para o seu mantemento e conservación.

Augas de Galicia, no plan de xestión específico realizado na área de risco potencial significativo de inundación do río Anllóns, preveu distintas opcións para realizar actuacións que contribúan a minimizar o risco de inundación.

As actuacións que se consideran máis prioritarias son a demolición da edificación, a remodelación da ponte e a creación dun leito de augas altas na rúa Sol. Tamén se inclúen a remodelación integral do parque San Martiño, coa construción de motas de protección fronte ás avenidas; e a reparación da ponte na rúa Fomento, coa mellora do leito e as motas de contención augas abaixo da ponte.

Ademais levarase a cabo a mellora hidráulica do río Anllóns ao seu paso polo enlace entre a autoestrada AG-55 e a estrada AC-552, no lugar da Cepeira, en Sísamo; e realizarase un bypass na zona de Muíño do Quinto.

A maiores, Augas de Galicia inclúe a redacción do proxecto de demolición da ponte de San Martiño e da nova ponte da rúa Deza á rúa San Xoán Bautista, adxudicado hoxe, se ben esta actuación non está recollida expresamente no marco das actuacións iniciais previstas pola Xunta.

A Xunta segue apostando pola colaboración entre todas as administracións e axentes implicados para estar máis preparados fronte ás inundacións e acadar unha máis rápida e mellor recuperación fronte ás súas posibles consecuencias.