Galicia avanza na adecuación da formación no eido das tecnoloxías marítimas ás necesidades da industria naval e das enerxías mariñas renovables

O Centro Tecnolóxico do Mar-Fundación Cetmar organiza o vindeiro mércores un taller online no que os socios do proxecto europeo MATES, que coordina o ente dependente da Consellería do Mar e no que colaboran máis de 200 expertos de distintos ámbitos, exporán os avances acadados nos últimos meses de investigación co obxectivo de adecuar a formación no eido das tecnoloxías marítimas ás necesidades da industria naval e das enerxías mariñas renovables.

O consorcio desta iniciativa europea -que comezou en xaneiro de 2018 e finalizará en abril de 2022- aspira a cubrir o desfase entre a demanda e a oferta de capacidades por parte dos traballadores nos sectores marítimos da construción naval e das enerxías mariñas renovables mediante o deseño dunha estratexia a longo prazo que propicie a mellora na formación e na adquisición de capacidades por parte dos futuros profesionais das tecnoloxías marítimas.

O traballo realizado ata o momento e trasladado en anteriores seminarios apunta a que o uso de combustibles alternativos e de novas fontes de enerxía renovable serán claves para o futuro do sector da construción naval, especialmente no desenvolvemento de tecnoloxías baseadas en sensores e redes intelixentes así como o uso de big data. De cara ao futuro os expertos tamén consideran fundamental a dixitalización, a automatización e a robótica avanzada.

Os participantes neste taller -para o que a inscrición é de balde e dirixido a profesionais da construción naval e das enerxías mariñas renovables, tanto do eido da industria como da educación, a investigación ou a Administración pública- ofrecerán unha visión xeral do proxecto MATES e mostrarán os pasos seguidos para desenvolver unha estratexia de capacitación que inclúa a cuádrupla hélice nas tecnoloxías marítimas de Europa.

A axenda do encontro inclúe tamén a participación de representantes de organizacións e proxectos das distintas concas mariñas europeas que presentarán as súas opinións e expectativas sobre o despregue da estratexia de MATES nas súas rexións. De feito, as principais liñas de acción identificadas na primeira fase de análise do proxecto foron testadas a través de once experiencias piloto desenvolvidas polo Cetmar e os seus socios en diferentes puntos de Europa.

Ese traballo permitiu avaliar a posible adaptación da estratexia a diferentes contextos rexionais, probando formacións adaptadas ás necesidades emerxentes como a industria 4.0, materiais en formatos innovadores -tanto para o seu uso na aula como en contextos de aprendizaxe informal- e simulacións de espazos industriais para o seu uso con fins didácticos.

Recomendacións

Neste contexto, o consorcio do proxecto MATES propón unha serie de recomendacións para a cadea de valor dos dous sectores de referencia do proxecto co obxectivo de adecuar as capacidades dos traballadores ás necesidades emerxentes. Entre os aspectos analizados están as tecnoloxías dixitais e verdes, a xestión da innovación, a perspectiva de xénero, a cultura oceánica, a gobernanza e os estándares europeos da formación profesional.

O proxecto europeo MATES -Alianza marítima para promover a economía azul europea a través dunha estratexia de capacitación en tecnoloxía mariña- conta cun orzamento de preto de cinco millóns de euros e está cofinanciado polo programa Erasmus + da Unión Europea. Os traballos do Cetmar e dos seus socios comezaron en xaneiro de 2018 e está previsto que rematen en abril do próximo ano.