Os traballos de pavimentación nos últimos espazos do nó dos Concheiros, en Santiago, suporán afeccións ao tráfico a partir do luns

Os últimos traballos de pavimentación na zona do cruzamento dos Concheiros, en Santiago de Compostela, suporán afeccións ao tráfico a partir deste luns, día 20.
Será necesario o corte do acceso de entrada á rúa do Home Santo desde o nó dos Concheiros. Isto implica mudar o sentido de circulación nesta rúa, á que se accederá desde a rotonda de Bombeiros, habilitándose a saída pola rúa Angustia cara á rúa Betanzos ou rúa do Rosario.
Esta afección é necesaria para actuar na zona pola que foi desviado o tráfico de baixada, no marco das obras de mellora e integración paisaxística do Camiño Francés á súa entrada en Compostela realizadas no nó dos Concheiros e na avenida de Lugo.
Adicionalmente, tamén desde este vindeiro luns, cortarase ao tráfico a entrada á rúa Altiboia, desde Fonte dos Concheiros, para executar os traballos de formigonado da citada zona, cunha duración estimada de 10 días.

Actuación integral, cun investimento de máis de 3M€

A actuación integral no ámbito da avenida de Lugo e do Cruce dos Concheiros, na que a Xunta está a investir máis de 3 millóns de euros, ten o obxectivo de facer do nó dos Concheiros unha zona na que o Camiño sexa máis identificable para o peregrino, ademais de reforzar a seguridade viaria e mellorar os tráficos pensando no día a día dos veciños.

Trátase dunhas obras de remodelación complexas e de moita entidade, xa que incluíron tamén canalizacións, e é unha das principais actuacións das previstas pola Xunta no marco da estratexia de mellora e integración paisaxística dos Camiños Francés, Inglés e Portugués á súa entrada en Compostela.

No seu conxunto, o proxecto integral de posta en valor das Rutas Xacobeas á súa entrada en Santiago supón un investimento do Goberno galego de 12 millóns de euros.