A Xunta e o Clúster Turismo de Galicia ofrecen co Carné Xove un 10% de desconto en 21 establecementos hostaleiros e de ocio da provincia
O delegado territorial, Luis López, e o presidente da entidade, Cesáreo Pardal, informan desta iniciativa xuvenil nunha visita ao Campo de Paintball Parque Adrenalicia do Grove
A medida, orientada ás 400.000 mozas e mozos galegos de entre 12 e 30 anos, conta con máis de medio cento de hoteis, locais e actividades adheridas en toda Galicia
“Queremos que a xuventude poida ir recuperando a súa vida e queremos incentivar e apoiar as súas compras, as súas viaxes e as súas experiencias”, explicou o representante autonómico
A Xunta de Galicia, a través da Consellería de Política Social, e o Clúster Turismo de Galicia ofrecerán co Carné Xove un desconto do 10% en ata 21 establecementos hostaleiros e de ocio da provincia de Pontevedra, e máis de medio cento en toda Galicia, en virtude dun convenio de colaboración entre o Goberno galego e esta entidade.
Por este motivo, o delegado territorial da Xunta en Pontevedra, Luis López, e o presidente do Clúster Turismo de Galicia, Cesáreo Pardal, informaron do contido e das vantaxes desta iniciativa xuvenil nunha visita celebrada este mediodía ao Campo de Paintball Parque Adrenalicia do Grove, que é unha das posibilidades de lecer susceptible de ofrecer estas rebaixas á xuventude.
“A mocidade e o turismo foron dos colectivos máis prexudicados polas necesarias restriccións fronte á pandemia e queremos impulsar a reactivación deste importante sector económico para Galicia e que a xuventude poida ir recuperando a súa vida, polo que queremos incentivar e apoiar as súas compras, as súas viaxes e as súas experiencias”, explicou o representante autonómico.
Esta medida oriéntase ás 400.000 mozas e mozos galegos de entre 12 e 30 anos de idade que xa son posuidores do Carné Xove, que agora é gratuito e indefinido e só precisa ser activado para beneficiarse deste convenio e das demais vantaxes das que dispón ao ser recoñecido en toda España e nos 40 países europeos adheridos a esta identificación.
Respecto ao convenio co Clúster Turismo de Galicia, consiste na concesión de descontos en máis de medio cento de establecementos de servizos turísticos, hospedaxe, tendas, ou balnearios. Entre os mesmos figuran un total de 21 da provincia de Pontevedra -12 deles na bisbarra do Salnés- e son os seguintes: Casa Rodiño e Hotel Ría Mar (Meaño), Señorío de Rubiós (As Neves), Hotel Montemar, Camping Muiñeira, Essenzial Home Galicia, Adrenalicia e Hotel O Castro (O Grove), Hotel Los Galeones, Alecrín Actividades e Prado Surf (Vigo), Hotel Peregrina, Viajes Fisterra Slu, Hotel Gaivota, París Dakart Área Recreativa e Casa Santa María do Mar (Sanxenxo), Galiwonders (Pontevedra), Hotel Sena, (Caldas de Reis), Albergue Rincón del Peregrino (O Porriño), Camping Limens (Cangas) e Salvaturismo Galicia (Salvaterra).
Imaxes relacionadas
