O Goberno galego avanza no impulso desta infraestrutura estratéxica para a cidade, que suporá un investimento conxunto de arredor de 80 M€ no seu desenvolvemento
A Xunta anuncia no Diario Oficial da Unión Europea a licitación das obras da estación da terminal de autobuses e dos elementos comúns da intermodal da Coruña por 35 M€
Este trámite axiliza os prazos de contratación das obras que executará a Xunta: a nova terminal de autobuses integrada na de ferrocarril, que financia; o aparcadoiro, cuxo custo asume o Concello; e os elementos comúns na área da intermodal de San Cristóbal
A Xunta licitará as obras cando o Concello da Coruña e Adif validen o convenio proposto para concretar o reparto do financiamento e da execución dos distintos elementos
O Goberno galego financiará a nova terminal de autobuses ao carón da terminal ferroviaria da Sardiñeira, baixo a que se executará o aparcadoiro da área intermodal, con máis de 350 prazas
A Xunta traballa no impulso deste proxecto estratéxico para dotar á cidade dunha infraestrutura que funcione como nó do transporte público de viaxeiros, como xa se fixo en Ourense ou Santiago, que xa teñen as súas intermodais en funcionamento
A Xunta de Galicia publicou hoxe no Diario Oficial da Unión Europea (DOUE) o anuncio previo de licitación das obras de construción da terminal de autobuses e dos elementos comúns da estación intermodal da Coruña, por un investimento estimado de 35 millóns de euros.
No seguinte enlace pode consultarse o anuncio no Diario Oficial da Unión Europea: https://ted.europa.eu/TED/notice/udl.
Este trámite permite a próxima contratación das obras que vai executar pola Xunta: a nova terminal de autobuses integrada na de ferrocarril, que financia integramente a Administración autonómica; o aparcadoiro que financia o Concello da Coruña; e os elementos comúns integrados na área da intermodal de San Cristóbal, cuxo custo asume maioritariamente Adif, e tamén o Concello da Coruña.
Este novo paso permite axilizar os prazos de contratación das obras que prevé licitar a Administración autonómica como encargada da xestión e execución destas obras. Isto será posible no momento que o Concello da Coruña e Adif acepten e asinen a proposta de convenio remitida en xuño pola Xunta, que simplifica e xunta nun único acordo a colaboración para incorporar á cidade ao mapa da intermodalidade, fixando os termos concretos do reparto do financiamento e da execución das obras.
O pasado mes de maio se formalizou o convenio marco de colaboración entre a Xunta, o Ministerio de Transportes, Mobilidade e Axenda Urbana e o Concello da Coruña, para materializar un investimento conxunto de case 80 M€ para o desenvolvemento da estación intermodal, que debe concretarse agora nun convenio de desenvolvemento.
A nova estación de autobuses intermodal
A Xunta será a encargada de financiar a nova estación de autobuses integrarase na actual estación de ferrocarril no espazo existente entre a avenida da Sardiñeira e as vías ferroviarias, posibilitando que ambas as terminais conformen unha área de transporte intermodal, que integre o transporte público de viaxeiros en autobús co tren na cidade. Baixo a laxa da terminal de autobuses executarase tamén o aparcadoiro de turismos da área intermodal, con máis de 350 prazas.
Co obxecto de optimizar a coordinación das obras que se desenvolverán na área intermodal, executarase, conxuntamente e no mesmo contrato de obra, a actuación de elementos comúns da remodelación da estación ferroviaria e a terminal de autobuses, que incorpora as infraestruturas ou instalacións que sexan compartidas por ambas as estacións, garantindo a independencia e compatibilidade construtiva entre ambas.
As obras son susceptibles de cofinanciamento no marco do programa europeo Next Generation UE, fronte á pandemia da covid-19.
A Xunta segue a traballar no impulso deste proxecto estratéxico para dotar á cidade herculina dunha infraestrutura que funcione como un gran centro de transporte público e permita o intercambio entre o autobús en cuestión de poucos minutos. Trátase de facilitar o desenvolvemento da estación intermodal da cidade, como xa se fixo en Ourense ou Santiago de Compostela, que hoxe teñen estas infraestruturas xa en funcionamento e ao servizo de veciños e usuarios.