A Xunta licita por máis de 305.000 euros 5 actuacións para reducir o risco potencial de inundación nos concellos de Padrón e de Valga
Trátase de redactar os proxectos construtivos para minimizar o risco de asolagamento nestes municipios, previstos por Augas de Galicia no marco do Plan de xestión específico para a área fluvial dos ríos Ulla e Sar, declarada de risco potencial de inundación
Licítanse 4 contratos para definir as accións en Padrón, que inclúen un canal de protección contra inundacións no rego Avelenda en Iria Flavia, así como a mellora dos espazos fluviais e de drenaxe neste rego; tamén actuacións no río Sar no cruce coa AC-301; e no rego Tarrío no cruce co ferrocarril
O quinto contrato céntrase no municipio de Valga e permitirá definir as actuacións de mellora do espazo fluvial do río Valga, entre a liña de ferrocarril e a rúa Devesa
As empresas interesadas nestes contratos teñen de prazo ata o día 24 de agosto para presentar as súas ofertas
A Consellería de Infraestruturas e Mobilidade, a través de Augas de Galicia, licitou hoxe por máis de 305.000 euros a redacción dos proxectos construtivos para impulsar cinco novas actuacións para reducir o risco de asolagamento na área fluvial dos ríos Ulla e Sar, ao seu paso polos concellos de Padrón e de Valga.
Todas son intervencións deseñadas desde Augas de Galicia e enmarcadas no Plan de xestión específico para esta área fluvial, declarada de risco potencial significativo de inundación.
A Plataforma de contratos públicos de Galicia recolle hoxe a licitación de catro actuacións a desenvolver no municipio coruñés de Padrón, á que se suma outro contrato para intervir no concello pontevedrés de Valga.
Dos cinco lotes licitados hoxe, catro contratos correspóndense con actuacións a desenvolver en Padrón, que se veñen sumar ao contrato xa adxudicado recentemente por Augas de Galicia nesta área fluvial, para a redacción do proxecto construtivo de protección da marxe dereita do río Ulla de cara a minimizar o risco de asolagamento ao seu paso polo concello.
Os contratos obxecto desta nova licitación no municipio coruñés de Padrón centraranse na redacción dos proxectos construtivos para dotar de canal de protección contra inundacións ao rego Avelenda ao seu paso por Iria Flavia; na mellora do espazo fluvial e de drenaxe do rego deste rego; na mellora do espazo fluvial e de drenaxe do río Sar no cruce coa estrada AC-301; e na mellora do espazo fluvial e de drenaxe do rego Tarrío no cruce co ferrocarril;
Doutra banda, neste marco de actuación que impulsa a Xunta para minimizar os riscos de asolagamento en Valga, Augas de Galicia licita hoxe o contrato para definir as actuacións de mellora do espazo fluvial do río Valga, entre a liña de ferrocarril e a rúa Devesa. Este contrato, desenvolvese no marco do convenio de colaboración co Concello de Valga, cuxa sinatura foi autorizada onte polo Consello da Xunta e que suporá un investimento autonómico de 1,25 millóns de euros.
Así, coa licitación hoxe deste contrato, complétanse as intervencións previstas para minimizar o risco de asolagamento no municipio pontevedrés de Valga. Cómpre lembrar que Augas de Galicia ten xa adxudicados o proxecto de mellora do espazo fluvial do río Louro entre a estrada PO-548 e a liña de ferrocarril, e o de actuacións de protección da marxe dereita do río Valga.
As empresas interesadas nestes cinco contratos teñen de prazo ata o día 24 de agosto para presentar as súas ofertas.
Plan de xestión específico da área de risco potencial significativo de inundación
Augas de Galicia redacta e revisa cada seis anos a avaliación preliminar do risco de inundacións da demarcación hidrográfica Galicia-Costa. Desde o 1 de maio e ata o vindeiro 30 de xullo está aberto á participación pública o novo Plan de xestión de risco de inundacións 2021-2027, que se agarda aprobar a finais de ano.
En paralelo, Augas de Galicia está a desenvolver os plans específicos de xestión en 9 zonas fluviais con maior risco de inundacións. Trátase das contornas do río Umia, en Caldas de Reis e Portas; Anllóns, en Carballo; Campeda, en Vimianzo; Bahíña e o Groba, en Baiona; Lagares, en Vigo; Fontecova e Trasposta, en Viveiro; e o río Ulla-Sar en Valga e Padrón, así como en Dodro, Rianxo, Rois, Catoira e Pontecesures.
Estes plans recollen medidas e actuacións paliativas e preventivas de aplicación polas distintas administracións, Xunta e Concellos, para minimizar o risco de enchentes.
O departamento que preside Ethel Vázquez segue impulsando a colaboración entre as administracións e axentes implicados para estar máis preparados fronte ao risco de inundacións e acadar unha máis rápida e mellor recuperación fronte ás súas posibles consecuencias.