Ethel Vázquez salienta que 550 mozos de Deza viaxan gratis por toda Galicia coa tarxeta Xente Nova, con aforros de 1.350 euros ao ano nas viaxes cara a Santiago

A conselleira de Infraestruturas e Mobilidade, Ethel Vázquez, salientou hoxe que 550 mozos da comarca de Deza viaxan gratis por toda Galicia empregando a tarxeta Xente nova da Xunta, que lles permite aforros de 1.350 euros ao ano nas viaxes cara a Santiago.

A titular de Infraestruturas e Mobilidade, xunto co alcalde de Lalín, José Crespo, e o delegado territorial da Xunta en Pontevedra, Luis López, supervisou esta mañá na estación de autobuses do municipio o funcionamento da tarxeta Xente Nova, que permite viaxar gratis aos menores de 21 anos por toda Galicia no autobús interurbano da Xunta.

Ethel Vázquez explicou que, ata hai mes e medio, esta tarxeta estaba operativa nas áreas de transporte metropolitano, na provincia de Ourense e en 13 concellos da área de Pontevedra, pero agora xa é unha realidade en toda Galicia, desde que o pasado 21 de maio a Xunta estendeu a súa cobertura territorial a toda a comunidade.

Concretou que, a día de hoxe, son 260 os mozos de Lalín que dispoñen deste dispositivo, co que teñen dereito a realizar ata 60 viaxes ao mes de balde en calquera das máis de 3.100 liñas de autobús renovadas que xestiona a Xunta, desprazándose gratuitamente cara aos municipios veciños de Silleda, de Agolada ou de Rodeiro, pero tamén cara a cidades como Santiago, Ourense ou Pontevedra e polos 313 concellos galegos.

Ethel Vázquez remarcou que a tarxeta Xente Nova supón unha conquista social para a mocidade galega no acceso a servizos básicos como a educación e a sanidade, mediante un transporte público gratuíto; un revulsivo no fomento do transporte entre os máis novos; e tamén un alivio para o peto das familias, que quedan liberadas de afrontar o gasto do transporte dos seus fillos.
Trátase, dixo, dunha medida social moi potente e demandada", máis nun concello como Lalín, no que son moitos os mozos que cada día se desprazan a estudar á universidade en Compostela e que agora poden viaxar gratis empregando a Xente Nova.

De feito, segundo explicou, o aforro para a familia dun rapaz de Lalín que se despraza todos os días a estudar a Santiago no transporte público da Xunta acada os 1.350 euros ao ano coa tarxeta Xente Nova, nos 9 meses que dura o curso. No caso dun mozo de Lalín que estude en Ourense ou en Lugo o aforro anual será de 1.500 euros; e se estuda en Pontevedra ese aforro increméntase ata os 1.800 euros ao ano.

A conselleira de Infraestruturas e Mobilidade salientou que, desde que se estendeu a Xente Nova ao conxunto da Comunidade, o número de tarxetas expedidas en Lalín tense incrementado de xeito significativo: fronte a unha única tarxeta expedida en abril, en maio foron 30 os mozos lalinenses que a solicitaron, e o dobre no mes de xuño, cando se expediron 60 novas tarxetas Xente Nova neste concello.

Ethel Vázquez puxo en valor a culminación, no mes de decembro, da renovación e modernización integral do transporte público da Xunta, para ofrecerlle aos cidadáns servizos máis modernos e mellor adaptados ás súas necesidades de desprazamento, favorecendo a mobilidade no rural, coas novas modalidades de transporte postas en marcha, o transporte compartido e a demanda.

No caso concreto de Lalín, esta modernización do mapa de transportes abrangueu un total de 83 liñas que pasan polo municipio e supuxo incrementar en máis do 100% o número de rutas e en case un 40% as paradas.

Os novos servizos postos en marcha permitiron, segundo explicou a titular de Infraestruturas e Mobilidade, dotar aos veciños de mellores servizos cara a cidades como Santiago, Lugo, Ourense, Pontevedra ou Vigo, pero tamén mellores conexións entre os distintos núcleos do municipio e cos concellos veciños.