A Xunta executa obras de mellora do firme en 11 quilómetros da estrada LU-653, que conecta A Pobra do Brollón e O Incio

A Consellería de Infraestruturas e Mobilidade está a executar obras de mellora do firme na estrada LU-653, que conecta A Pobra do Brollón con Hospital do Incio.
O delegado territorial da Xunta en Lugo, Javier Arias, comprobou hoxe o avance dos traballos, que se levaron a cabo durante as últimas tres semanas e está previsto que finalicen entre hoxe e mañá.
Arias apuntou que a Administración galega inviste 85.100 euros na mellora de case 11 quilómetros da vía -desde o punto 3,200 ata o 14,100 -, dentro do termo municipal da Pobra do Brollón. A intervención consiste na reparación localizada do pavimento nos treitos que o precisan e a aplicación posterior dun dobre tratamento superficial de regos asfálticos con grava.
“Trátase dunha actuación necesaria para mellorar a seguridade e a comodidade dos usuarios desta estrada que vertebra as comunicacións dentro do concello da Pobra do Brollón e que beneficiará de xeito especial á veciñanza de núcleos como A Ferreirúa, Pacios e Biduedo”, indicou o delegado.
As obras son executadas pola Axencia Galega de Infraestruturas (AXI) con cargo ao contrato de conservación ordinaria e vialidade invernal das estradas da Zona Sur da provincia de Lugo.