A Xunta somete a información pública os proxectos das sendas de Soesto e Serantes, en Laxe, que suporán un investimento autonómico de 334.000 euros

A conselleira de Infraestruturas e Mobilidade, Ethel Vázquez, informou hoxe do inicio do proceso polo que se someten a información pública os proxectos das sendas de Soesto e Serantes, en Laxe, que suporán un investimento autonómico de 334.000 euros.

Vázquez Mourelle presentou hoxe proxectos destes dous itinerarios, que se construirán ao longo da antiga traza da estrada AC-433 co obxectivo de facilitar os desprazamentos a pé dos veciños e favorecer unha mobilidade máis segura e sostible nestes núcleos.

Subliñou que esta intervención suporá executar en total preto de 1.300 metros de sendas, que se construirán en formigón coloreado, para facelas máis visibles, e de cor terrizo natural, para unha mellor integración na contorna. O ancho deste itinerarios oscilará entre os 1,50 e os 2 metros.

A publicación hoxe no Diario Oficial de Galicia do inicio da información pública ten efectos expropiatorios, de forma que, como explicou a conselleira, os titulares das 19 fincas afectadas polo proxecto e todos os interesados dispoñen de prazo ata o vindeiro 11 de agosto para presentar as súas achegas.
A titular de Infraestruturas da Xunta indicou que, a partir de aí, continuarase cos trámites necesarios, co obxectivo de licitar as obras a finais de ano para a súa execución en 2022. Os traballos contarán cun período para a súa execución de 8 meses.
Concretou que a senda do núcleo de Soesto conectará os lugares de O Rueiro e Castrelo a través dun itinerario de preto de 600 metros que se construirá pola marxe esquerda da vía, no treito máis urbanizado e, tamén, o que empregan os veciños para ir á praia de Soesto.

No caso de Serantes, a senda executarase ao longo de algo máis de 700 metros pola marxe da estrada actual, pero apoiada na antiga traza, entre os núcleos de Conlle e O Piñeiro. Neste caso, a conselleira precisou que o itinerario irá pola marxe dereita, para facilitar a conexión coa igrexa de Santa María de Serantes e o cemiterio.

Ethel Vázquez indicou que as novas actuacións en Laxe se suman á senda peonil e ciclista que conecta a vila e o paseo marítimo, xa en servizo desde o pasado verán, que supuxo un investimento da Xunta de 330.000 €. Con ese itinerario conéctase a zona deportiva, educativa e de lecer de Cabo da Area, centro de equipamentos do municipio, coa propia vila

Os novos itinerarios que a Xunta construirá en Laxe súmanse aos 11 km de sendas construídos no marco da primeira fase do Plan de sendas da comarca de Bergantiños, que culminará coa que se está a executar entre Carballo e Coristanco.

A conselleira avanzou a construción de novas sendas na comarca, como a que está prevista no Couto, en Ponteceso, ou a que conectará o centro comercial de Coristanco. Trátase, dixo, de actuacións que buscan dotar aos veciños de itinerarios que lle permitan facer os seus desprazamentos cotiás de xeito máis cómodo, seguro e sustentable.

Vázquez Mourelle puxo en valor o traballo do Goberno galego por favorecer a mobilidade, tamén no transporte público. A ese respecto, subliñou as vantaxes da extensión da tarxeta Xente Nova a toda Galicia o pasado 21 de maio. Iso permite, dixo, que os menores de 21 anos que dispoñen deste dispositivo -40 en Laxe e máis de 2.000 na comarca de Bergantiños- poidan viaxar gratis cara á Coruña ou cara á Santiago, pero tamén polos 313 concellos galegos nos autobuses da Xunta.