Ethel Vázquez salienta que a Xunta seguirá a dar a batalla ante o Goberno de España para que os galegos dispoñan de servizos de tren competitivos e de calidade

Santiago de Compostela, 29 de xuño de 2021.- A conselleira de Infraestruturas e Mobilidade, Ethel Vázquez, salientou hoxe que a Xunta dará a batalla e manterá a reivindicación ante o Goberno de España para que os galegos dispoñan de servizos de tren competitivos e de calidade.
Vázquez Mourelle, xunto co director xeral de Mobilidade, Ignacio Maestro, mantivo está mañá en San Caetano unha xuntanza co coordinador do sector ferroviario do sindicato Comisións Obreiras Galicia, Gregorio Bermejo, e cos seus representantes provinciais.
A titular de Infraestruturas e Mobilidade sinalou a preocupación da Xunta pola situación dos transporte ferroviario en Galicia, na medida en que afecta aos usuarios e tamén incide no emprego no sector. Ethel Vázquez asegurou que Galicia rexeitou que a pandemia sexa empregada como escusa por parte do Goberno de España para recortar prestacións e postos de traballo no tren.
Vázquez Mourelle contabilizou en preto de medio cento os escritos remitidos desde o Goberno galego no último ano aos responsables de Renfe e do Ministerio, trasladando a preocupación ante as escasas frecuencias de tren e a non reposición dos servizos, cando a situación sanitaria xa o permitía e a demanda existente así o requiría, inquedanzas que tamén se trasladaron ao propio ministro no encontro mantido no mes de abril.
Lamentou que as respostas obtidas sempre foran na mesma dirección, limitándose a sinalar que se recuperarían os servizos cando aumentase a demanda. Iso, en palabras da titular de Infraestruturas e mobilidade “é un círculo vicioso, xa que se non se oferta un bo servizo aos cidadáns é imposible que se recupere a demanda”.
A conselleira sinalou que a día de hoxe, o restablecemento dos servizos de tren en Galicia segue a ser incompleto e insuficiente, e puxo de exemplo dos maiores problemas as liñas que prestan servizos rexionais: a liña Ferrol-Ribadeo, onde se pasou de 4 frecuencias ao día a só 1 por sentido; o mesmo ocorre na liña Ourense-O Carballiño, nas que só hai 1 frecuencia ao día; ou entre Ferrol-A Coruña, onde seguen sen restablecerse aínda 2 liñas; xunto coa liña internacional con Portugal, onde os servizos están só restituídos ao 25%.
Salientou que tampouco se repuxeron os trens hotel, con Madrid e Barcelona, a pesar de que son liñas que prestan un servizo esencial á cidadanía, e nas que se ve escaso interese por parte de Renfe en restablecelas.
Ethel Vázquez referiuse, ademais, a que os servizos de longa distancia con Madrid que se puxeron en marcha este mes de xuño non fan parada en Vilagarcía. Neste sentido expresou a coincidencia da Xunta e dos representantes de Comisións Obreiras coa demanda do propio Concello de que Vilagarcía ten que ser parada obrigada do tren, xa que suporía escasos 5 minutos para atender unha demanda potencial de 100.000 persoas.
Os representantes da Xunta e de Comisión Obreiras coincidiron tamén na necesidade de que os investimentos a nivel da infraestrutura -o AVE ou as estacións intermodais-, deben ir acompañados de mellor material rodante -os trens AVRIL-, e de servizos acordes ás necesidades de mobilidade dos cidadáns.
A titular de Infraestruturas e Mobilidade contrapuxo a situación do tren cos servizos de transporte público interurbano de competencia da Xunta. Vázquez Mourelle lembrou que nos peores momentos da pandemia, a Xunta mantivo sempre autobuses en circulación, que se foron restablecendo de xeito acorde á evolución sanitaria. Remarcou que desde o pasado 10 de maio, unha vez superado o estado de alarma e as restricións de mobilidade, a Xunta restituíu a totalidade dos servizos de autobús da súa titularidade.