Feijóo traslada ao Papa Francisco a invitación do pobo galego a que peregrine a Santiago neste ano santo 21-22
Agradece en nome de todos os galegos o “privilexio” de poder celebrar o Ano Santo ata o 2022; un feito que ocorre por primeira vez na historia e que, segundo di, enche de esperanza a toda Galicia
Destaca o vínculo dos galegos co feito da peregrinación e reitera o compromiso para que a Comunidade siga a ser unha das rexións europeas máis seguras, como acreditan os datos
O presidente da Xunta, Alberto Núñez Feijóo, trasladou hoxe á Súa Santidade o Papa Francisco a invitación do pobo galego a que peregrine a Santiago de Compostela neste Ano Santo 21-22. “Sería sen dúbida a mellor noticia que poderíamos recibir os galegos”, abundou.
Durante a audiencia mantida esta mañá, na que acompañou ao arcebispo de Santiago de Compostela, Julián Barrio, Feijóo agradeceu ao pontífice, en nome de todos os galegos, o “privilexio” de poder celebrar o Ano Santo ata o 2022; un feito que ocorre por primeira vez na historia e que, segundo dixo, enche de esperanza a toda Galicia.
Peregrinar a Galicia é seguro
Nesta liña, destacou o vínculo dos galegos co feito da peregrinación e a responsabilidade que isto implica, reiterando o compromiso para que Galicia siga a ser unha das rexións europeas máis seguras, como acreditan os datos.
“Peregrinar a Galicia é seguro”, aseverou o titular do Executivo autonómico, recordando que a Comunidade conta co Seguro Covid que garante a asistencia sanitaria para todos os que nos visiten en caso de contaxio.
Así mesmo, valorou o feito de que nos primeiros días do mes de xuño o número de peregrinos sexa superior xa ao de todo o mes de maio.
Ao longo do encontro, Feijóo entregou ao pontífice unha concha de bronce, símbolo do Camiño, e un libro sobre a arquitectura tradicional galega.
Imaxes relacionadas
