O IGVS formará a 10 graduados en titulacións relacionadas coa vivenda e o urbanismo para facilitar a súa inserción laboral
É a segunda vez que o departamento autonómico convoca este tipo de bolsas, cunha duración de 12 meses prorrogables por outros 6 e dirixidas a universitarios que finalizaran os seus estudos superiores despois do 1 de xaneiro do ano 2018
O Instituto Galego da Vivenda e Solo (IGVS) convocará este ano 10 bolsas formativas dirixidas a titulados nos graos de Arquitectura, Arquitectura Técnica, Dereito e Economía para darlles a oportunidade de realizar prácticas complementarias aos seus estudos e favorecer así o seu acceso ao mercado de traballo pola vía da especialización en materias relacionadas coa vivenda.
Tras recibir recentemente o visto e prace do Consello da Xunta, o organismo autonómico ofrecerá por segunda vez formación remunerada a persoas que se acaben de graduar en titulacións relacionadas cos seus distintos eidos de actuación, aínda que nesta ocasión estenderase a novas ramas profesionais.
Así, se na convocatoria de 2019 ofertáronse seis bolsas para graduados en estudos de Arquitectura e dúas máis para titulados de Arquitectura Técnica, este ano o IGVS ofertará 10 prazas coa seguinte distribución: seis para persoas co grao en Arquitectura ou con grao en estudos de Arquitectura con máster habilitante; dúas para graduados en Arquitectura Técnica; unha para titulados en Dereito, e outra para persoas co grao de Economía.
O obxectivo é facilitar a realización de prácticas complementarias aos estudos teóricos que ofrecen estas catro ramas, así como favorecer o acceso ao mercado laboral de estudantes que rematasen recentemente a súa formación superior —con posterioridade ao 1 de xaneiro de 2018— e non teñan aínda un emprego remunerado ou unha bolsa similar.
De feito, durante as súas prácticas no IGVS, estes novos profesionais recibirán formación en materias relacionadas coa construción e promoción de vivenda pública, a tramitación do planeamento sectorial do solo e a redacción e xestión de plans e proxectos técnicos urbanísticos. Así mesmo, tamén adquirirán coñecementos e experiencia relativos ás funcións de contido xurídico, económico e contable derivadas das devanditas actuacións.
As prácticas terán unha duración de 12 meses, podendo prorrogarse por un novo período de 6 meses máis, e levarán asociado un custo de 126.000 euros. A previsión é que a vindeira semana se publique no DOG a convocatoria das 10 bolsas formativas e que os seleccionados se incorporen aos seus postos no mes de outubro.