A Xunta remite ao Concello e a Adif unha proposta de convenio para axilizar a tramitación da intermodal da Coruña e facilitar o investimento de 17,5 M€ na nova terminal de autobuses

A Xunta remitiu hoxe ao Concello da Coruña e a Adif unha proposta de convenio para axilizar a tramitación da intermodal da cidade e para facilitar as obras da terminal de autobuses, ás que a Administración autonómica destinará 17,5 millóns de euros.

A conselleira de Infraestruturas e Mobilidade, Ethel Vázquez, xunto co delegado territorial da Xunta, Gonzalo Trenor, avanzou hoxe esta proposta, coincidindo coa visita á estación de autobuses da Coruña para supervisar o funcionamento da tarxeta Xente Nova. Este dispositivo, que permite que os menores de 21 anos poidan viaxar gratis nos autobuses da Xunta, estendeu a súa aplicación a todas as liñas da Comunidade o pasado 21 de maio.

Vázquez Mourelle destacou a forte aposta polo transporte público que está a facer a Xunta, ofrecendo máis e mellores servizos aos cidadáns e mellorando, tamén, as infraestruturas. Así, sinalou que de xeito parello á mellora dos servizos de transporte, o Goberno galego está a dotar as principais cidades galegas de novos equipamentos e estacións de autobuses modernas, que permiten a intermodalidade no transporte.

A conselleira apuntou o traballo do Goberno galego por incorporar a cidade da Coruña ao mapa da intermodalidade, superando os retrasos acumulados e apostou por traballar agora con axilidade e simplificando os trámites pendentes.

Con ese obxectivo, a Xunta propón o convenio remitido hoxe ao Concello e a Adif, para a súa avaliación. Trátase dunha proposta que simplifica e que aúna nun único convenio a construción da estación de autobuses e o proxecto de elementos comúns, que se encargaría de executar, en ambos os dous casos, a Xunta.

O obxectivo é reducir a tramitación e reducir os prazos, ao ser unha única administración, a autonómica, a encargada da xestión e execución das obras da estación de autobuses e dos elementos comúns. Na comisión técnica de seguimento da estación intermodal da Coruña, convocada para mañá, o Goberno galego explicará os detalles da proposta.

Ethel Vázquez indicou que o Goberno galego agarda a resposta positiva a esta proposta, xa que ten por obxectivo simplificar e axilizar a tramitación “para que a cidade da Coruña se suba á intermodalidade canto antes” e para que a Administración autonómica poida licitar e avanzar nas obras da estación de autobuses intermodal nas que investirá 17,5 M€.

Transporte gratuíto para mozos en toda Galicia

Na visita á estación de autobuses da Coruña, a conselleira tamén puxo en valor as medidas impulsadas pola Xunta para o fomento do transporte público na área da Coruña. Citou as vantaxes e beneficios da posta en marcha do Plan de transporte metropolitano, a entrada dos buses metropolitanos ao centro da cidade e, tamén, a incidencia nesta área da renovación e modernización integral de todas as liñas de autobús interurbano en toda Galicia.

A estas medidas da Xunta súmase agora a recente extensión a toda Galicia da tarxeta Xente Nova, coa que os menores de 21 anos poden viaxar de balde no transporte interurbano da Xunta. Explicou que a iniciativa, que xa funcionaba na área da Coruña desde o 2016, agora estendeuse ao conxunto da Comunidade, de forma que os 23.500 mozos da Coruña e dos concellos da área que teñen a tarxeta Xente Nova poden viaxar de balde polos 313 concellos galegos nos buses da Xunta.

Apuntou que desde a posta en marcha desta tarxeta, a Xunta bonificou máis de 3 millóns de viaxes por importe superior aos 3 M€, só na área da Coruña. Sinalou, ademais, que desde o anuncio da extensión territorial da tarxeta Xente Nova, o número de dispositivos expedidos na área da Coruña triplicouse con respecto ao mes de abril, case 590 tarxetas expedidas en maio fronte ás 180 que se emitiron en abril.