A Xunta destaca o espírito emprendedor do Concello da Laracha, que dá a benvida a Unifersa ao seu polígono empresarial

O vicepresidente económico e conselleiro de Economía, Empresa e Innovación, Francisco Conde, destacou hoxe o crecemento que está levando a cabo a empresa especializada na venda de ferraxería Unifersa, que suma ás súas instalacións de Vilar do Colo en Fene unha nova nave no polígono da Laracha.

Durante o acto de colocación da primeira pedra do que será un novo centro loxístico da firma galega, Conde puxo en valor este feito apuntando a que se trata dunha dobre vitoria para Galicia, xa que este feito consolida a capacidade loxística de Unifersa e supón un revulsivo na actividade industrial do concello.

A este respecto, o vicepresidente económico salientou o espírito da Laracha que, como Concello Emprendedor, contribuíu a que Unifersa poida contar cunha parcela de 42.000 m2 para lograr unha maior operatividade loxística.

A pesar dun 2020 marcado pola pandemia da covid-19, a empresa con sede en Fene experimentou en torno a un 20% de crecemento e, no que vai de 2021, xa supera o 55% con respecto ao ano pasado.

Innovación e dixitalización

Francisco Conde fixo referencia ao desafío que ten nestes momentos o tecido produtivo de Galicia tras o aumento exponencial do comercio por internet durante o último ano. Así, puxo como exemplo de adaptación a esta nova realidade a Unifersa, que acaba de presentar a súa nova plataforma de venda directa desde a que os seus asociados poden acceder a produtos de máis de 400 provedores, que acadan máis de 416.000 artigos. “Vemos como unha empresa que innova e se dixitaliza é unha empresa que crece, diversifica os seus produtos e, sobre todo, amplía o seu mercado”, sinalou.

Así mesmo, o vicepresidente económico fixo un chamamento ao traballo conxunto entre administracións para dar resposta ás necesidades do tecido empresarial nesta nova normalidade.