A Xunta de Galicia divulga as historias de éxito da xuventude galega por redes sociais e ao abeiro de Talento Mozo

A Xunta de Galicia divulga a creatividade, enxeño e emprendemento da xuventude galega con charlas que se emiten a través de redes sociais enmarcadas na iniciativa Talento Mozo. A directora Xeral de Xuventude, Participación e Voluntariado, Cristina Pichel, a través da conta de Instagram @xuventudegalega realiza entrevistas a mozas e mozos, cuxa experiencia serve de exemplo á xente nova da comunidade.

No día de hoxe Cristina Pichel deu a coñecer a historia do santiagués Manuel Fernández Fernández, xerente da empresa gandeira Servicios Ganaderos Monte do Gozo. Unha empresa creada no 2018 que ten implantación por toda a Comunidade. Durante a charla, emitida en directo, este mozo de 22 anos puido compartir a súa experiencia e as claves para convertese en emprendedor a tan pronta idade.

Neste 2021, a través das entrevistas realizadas ao abeiro de Talento Mozo, a directora xeral de Xuventude, Participación e Voluntariado tamén falou con Susana Álvarez, socia de Cabanas do Ulla; coa xornalista Esther Estévez; con Jorge López e Tatiana González, creadores da marca de moda ecolóxica Beflamboyant; con Xosé González, cociñeiro do restaurante Ceibe, de Ourense; e coas irmáns viguesas Eva e Marta Yarza, fundadoras da empresa Yarza Twins.

Nova convocatoria Talento Mozo

Este mes de abril abriu unha nova convocatoria dos premios Talento Mozo para recoñecer traxectorias excelentes e proxectos impulsados pola xente nova. Con este certame procúrase dar visibilidade ao enxeño e capacidade da mocidade en cinco modalidades: Ciencia, Cultura e creación, Deporte, Empresa e Rural.

Trátase da segunda edición destes galardóns, nos que a Xunta de Galicia premiará as mellores candidaturas cunha dotación económica de 5000 euros por categoría. O prazo de presentación de solicitudes está aberto ata o día 30 de abril.