A Xunta recibe un total de 13 ofertas para executar as obras de mellora de firme en 4 estradas autonómicas nas comarcas do Eume, Ferrol e Ortegal, que suporán un investimento de 1,4 M€
As obras, que comezarán no verán, realizaranse nas estradas AC-101, AC-546, AC-566 e AC-861, nos concellos de Cedeira, Ortigueira, Cabanas, A Capela e As Pontes
A Consellería de Infraestruturas e Mobilidade vén de recibir un total de 13 ofertas para executar as obras de mellora de firme en catro estradas autonómicas nas comarcas do Eume, Ferrol e Ortegal, que suporán un investimento autonómico de case 1,4 millóns de euros.
Estas actuacións, que se prevén iniciar no verán, consistirán no acondicionamento da capa de rodadura das estradas AC-101, AC-546, AC-566 e AC-861, ao seu paso polos concellos de Cedeira, Ortigueira, Cabanas, A Capela e As Pontes.
De modo máis concreto, na estrada AC-101, actuarase entre os puntos quilométricos 1+300 e 29+607; na AC-546, entre o 0+060 e o 26+030; na AC-566, entre o 30+500 e o 41+560; e na AC-861, entre o 20+920 e o 24+860.
Os traballos inclúen a limpeza de cunetas, o acondicionamento dalgunhas interseccións, a rehabilitación do firme e a instalación de nova sinalización.
Segundo o treito, levaranse a cabo traballos de fresado de 6 cm e a posterior reposición co mesmo espesor con aglomerado. Ademais, estenderase microaglomerado en frío para a mellora na adherencia nas curvas.
A Xunta continúa traballando na conservación e no mantemento da rede viaria autonómica coa fin de proporcionarlles unhas estradas máis seguras e cómodas aos cidadáns.