A Xunta aborda coa Fundación ONCE a adaptación da estación intermodal de Santiago ás persoas con cegueira ou limitación visual

A Xunta abordou hoxe coa Fundación ONCE a adaptación da estación intermodal de Santiago ás necesidades de persoas con cegueira ou con limitación visual.

A conselleira de Infraestruturas e Mobilidade, Ethel Vázquez, visitou as instalacións da nova terminal de autobuses co director xeral de Maiores e Persoas con Discapacidade, Fernando González, e o presidente do Consello Territorial da ONCE en Galicia, Carlos Fernández, ademais doutros representantes da entidade.

Os representantes da Fundación ONCE constataron o traballo executado para facer accesibles estas instalacións e facilitar a súa utilización por parte de persoas cegas ou con limitacións de visión.

Neste sentido, a terminal dispón de percorridos podotáctiles co obxectivo de favorecer a mobilidade deste colectivo, encamiñándoos polos diferentes elementos que conforman o complexo, para garantir así o seu acceso ao transporte público.

Xunto con isto, os carteis informativos instalados na estación de autobuses e na súa contorna tamén recollen a información en braille.

Ademais, os ascensores están adaptados para seren utilizados por persoas con cegueira ou limitación de visión.

O deseño da nova infraestrutura incluíu as características necesarias para facilitar os desprazamentos das persoas con necesidades especiais. Para isto, dispuxéronse ascensores nos accesos desde o edificio de viaxeiros ata as dársenas ou unha rampla exterior urbana para a conexión das estacións de autobuses e de tren, e destas coa cidade.

Na execución da estación de autobuses tamén se tiveron en conta, ademais, as necesidades especiais de diferentes colectivos, por exemplo, coa disposición de baños para usuarios ostomizados.

Os representantes da Fundación ONCE puideron coñecer o novo edificio da estación de autobuses, de 2 andares, cun total de 36 dársenas e unha superficie que supera os 13.000 metros cadrados.

Na visita tamén se realizou un percorrido pola pasarela, cuxas obras remataron a semana pasada, culminando así a Xunta a primeira fase da estación intermodal de Santiago.

Cómpre lembrar que o pasado mércores se asinou a acta de recepción das obras desta pasarela que conecta a nova estación de autobuses coa estación ferroviaria e une o Hórreo con Pontepedriña.

Unha vez que o Goberno galego rematou estas dúas intervencións, o traslado da actividade á nova terminal está pendente de que o Concello de Santiago formalice os contratos dos servizos para o seu correcto funcionamento, como limpeza, seguridade ou información.

Estas dúas actuacións, tanto a estación de autobuses financiada integramente pola Xunta, como a pasarela, executada pola Xunta pero tamén cofinanciada polo Concello e ADIF, supoñen un investimento total de 16 millóns de euros, dos que Goberno galego achega máis de 12.

O proxecto está cofinanciado pola Unión Europea, no marco do Programa Operativo FEDER Galicia 2014-2020.

Para completar este complexo intermodal e garantir a súa funcionalidade, cómpre que o Ministerio de Transportes elimine a cláusula dos 3,5 millóns de viaxeiros establecida como requisito para acometer as obras da reforma ferroviaria.