A Xunta ten xa instalado o mobiliario no edificio da gota de leche para acoller o novo xulgado do social de Vigo desde o 31 de marzo

O vicepresidente da Xunta, Alfonso Rueda, visitou hoxe o edificio da Gota de Leche que acollerá desde o 31 de marzo o novo xulgado Social nº7 de Vigo e que xa conta con todo o mobiliario necesario para o seu funcionamento. O novo xulgado ubicarase de xeito provisional neste edificio ata que estean rematadas as obras da Cidade da Xustiza á que se trasladará de forma definitiva. Á visita tamén acudiu a delegada territorial da Xunta en Vigo, Marta Fernández-Tapias.

A Xunta encargase da súa posta en marcha e xa aprobou as súas 8 prazas de funcionarios
-2 xestores, 4 tramitadores e 2 auxilios- . Ademais dos custos deste persoal tamén se ocupa da dotación de mobiliario, que como puido comprobar hoxe o vicepresidente primeiro xa está instalado, así como do equipamento informático, do que xa se están ultimando as conexións.

Deste xeito, o Goberno galego inviste 850.000 euros na creación dos tres novos xulgados do Social na comunidade galega: este nº7 de Vigo que se ubicará de forma provisional no edificio da Gota de Leche, xunto co nº7 da Coruña e o nº4 de Lugo.

A Xunta xa asignou a estes tres órganos xudiciais os postos necesarios para dotalos dunha plantilla suficiente para desenvolver as súas funcións. En concreto, 24 prazas de funcionarios cun total de 6 xestores, 12 tramitadores e 6 auxilios. De feito, o custo do persoal supón case o 85% do investimento tal con máis de 722.000 euros. O nomeamento de xuíces, fiscais e letrados da Administración depende do Ministerio de Xustiza.

Alfonso Rueda sinalou que para o Goberno galego é prioritario a posta en funcionamento destes tres órganos xudiciais para axilizar os asuntos pendentes da xurisdición do Social, que nestes momentos é unha das que máis carga de traballo ten debido á situación derivada da crise sanitaria da covid-19, xa que atende casos como Ertes ou despidos, con grande incidencia para moitas familias.