A Xunta inicia un novo modelo de apoio á actividade continuada das compañías escénicas con proxectos plurianuais

A Xunta de Galicia vén de lanzar un novo modelo de apoio para potenciar o traballo a medio prazo e a continuidade de equipos e proxectos das empresas teatrais. Con esta meta púxose en marcha en 2020 unha modalidade de axudas autonómicas para proxectos de carácter trianual, no marco da liña de subvencións á creación escénica do departamento de Industrias Culturais da Consellería de Cultura, Educación e Universidade.

Grupo Chévere e Talía Teatro, dúas das compañías coas traxectorias máis consolidadas e estables do actual panorama escénico galego, son as primeiras beneficiarias desta nova modalidade, cunha achega de 100.000 euros no caso de Talía e de preto de 95.000 euros, no de Chévere.

Estas axudas foron convocadas canda a outras tres modalidades dirixidas especificamente a novas compañías, a propostas de danza e artes do movemento e a espectáculos de teatro, maxia e novo circo. En total, foron 29 os proxectos doutras tantas compañías galegas adxudicatarios na última convocatoria á creación escénica, dotada con 800.000 euros.

Catro producións principais con accións asociadas

Cada un dos proxectos 2020-2022 presentados por Chévere e por Talía articúlanse arredor da produción e distribución de dous espectáculos principais, que dan pé ao desenvolvemento dunha serie de accións paralelas que van dende actividades formativas e pedagóxicas ata programas de creación de públicos para as artes escénicas, pasando pola investigación en diferentes narrativas asociadas ao feito teatral.

Premio Nacional de Teatro en 2014 e con máis de 30 anos de traxectoria, sempre con propostas orixinais, irreverentes e comprometidas, Chévere reúne un equipo de preto de 15 persoas nas dúas producións presentadas a esta convocatoria: As fillas bravas e o mito de Casandra, estreada o pasado mes de setembro, e Nevermore, título provisional da proposta que está comezando a súa construción dramatúrxica cara ao desenvolvemento dos ensaios durante os meses do verán. A crise da forma de vida actual polo cambio climático, ao que se suma a pandemia mundial da covid-19, é o tronco temático común destes dous proxectos, que se aborda en cada caso desde moi diferentes perspectivas, formatos e estratexias.

Se ben a irrupción e a evolución da actual crise sanitaria implicou unha reorganización temporal e dos procesos de traballo para ambas compañas, As fillas bravas e o mito de Casandra ten previsto retomar en marzo as súas representacións. Patricia de Lorenzo, Mónica García e Arantza Villar volven poñerse na pel destas tres mulleres maiores e de aldea, bravas e cantareiras, usando as fontes do teatro clásico grego e da música tradicional galega como ferramentas para a súa singular conversa cantada. A través dela, tratan de entender o cambio climático e aplicar a sabedoría popular para facerlle fronte, ao tempo que lle ofrecen ao público novos modelos de empoderamento feminino.

Xesús Ron púxose á fronte da dirección desta obra, así como da segunda produción, bautizada provisionalmente como Nevermore e para a que Chévere contará cun elenco de seis intérpretes: ademais das actrices de As fillas bravas, Miguel de Lira, Manuel Cortés e Borja Fernández. A compañía atópase nestes momentos combinando os procesos de investigación, documentación e construción dramatúrxica deste proxecto, co obxectivo de que poida estrearse á volta do verán.

Equipo e infraestrutura propios

Tamén son máis de tres décadas as que leva Talía Teatro en escena, apostando por un modelo de compañía cun equipo artístico e técnico estable −actualmente integrado por 11 persoas−, un amplo repertorio sempre en distribución e unha infraestrutura propia. Neste caso, prepara a estrea para finais do mes de setembro de A parábola do angazo, un monólogo de Artur Trillo no que, de novo, porá en valor a lingua galega a partir de anécdotas sobre o noso idioma e de feitos históricos arredor del.

Ao tempo, Cándido Pazó está xa a traballar na dramaturxia de Morte accidental dun anarquista, a coñecida obra do italiano Dario Fo, da que Talía fará unha versión en gran formato baixo a súa dirección e con nove actores e actrices en escena.