A Xunta adapta desde mañá os horarios de dúas liñas de transporte para atender as peticións de pais e profesores dos alumnos do CEIP Xoán de Requeixo de Chantada
O delegado territorial, Javier Arias, destaca a resposta da Consellería de Infraestruturas e Mobilidade para adiantar a saída 45 minutos, polo que queda fixada ás 15.15 horas tal e como solicitaba a comunidade educativa
A Xunta de Galicia atendeu as peticións de pais e docentes do CEIP Xoán de Requeixo, de Chantada, e dende mañá adapta os horarios de dúas liñas de autobuses, que permitirá adiantar a saída do centro ás 15.15 horas, en lugar das 16.00, no que estaba fixada. A Consellería de Infraestruturas e Mobilidade fixo este cambio de horario despois de ter coñecemento das peticións da Anpa e da comunidade educativa do colexio chantadino, nas que solicitaban o adianto do horario dalgunhas liñas de autobuses que parten do CEIP Xoán Requeixo.
O delegado territorial de Lugo, Javier Arias, sinalou que cando a Xunta tivo coñecemento desta situación unha vez falado coa directora do colexio, tomouse a decisión de cambiar o horario dalgunhas das liñas de autobús, a través da Consellería de Infraestruturas e Mobilidade. Con esta medida, tal e como pediu a dirección do centro, a saída dos alumnos poderase facer dende as 15.15 e de forma graduada.