Emigración destinou 1,6M€ euros en 2020 para apoiar a máis de 700 familias retornadas nos gastos extraordinarios derivados do seu regreso

A Secretaria Xeral da Emigración destinou en 2020 un total de 1,6M€ euros para apoiar os gastos extraordinarios derivados do regreso de 709 familias galegas que volveron a Galicia.

Tal e como explicou o secretario xeral da Emigración, Antonio Rodríguez Miranda este programa de axudas extraordinarias destínase a persoas emigrantes retornadas e as súas familias que regresaran á comunidade dende o exterior nos últimos dous anos e que necesitan apoio para facer fronte aos gastos extraordinarios derivados da súa volta a Galicia.

O obxectivo é facilitar o proceso de acompañamento a aqueles galegos que regresaron a súa terra, e inclúe un complemento de 1.000 euros para as familias por cada filla ou fillo menor de idade ata o segundo, e de 1.500 para o terceiro e sucesivos.

En total, presentáronse 902 solicitudes, aprobándose un total de 709. Por países, no continente americano destacan Venezuela, Arxentina e Brasil, mentres en Europa, o Reino Unido, Suíza e Alemaña encabezan o número de galegos que retornaron e solicitaron estas axudas. Como dato relevante, viuse reducido de xeito importante o número de retornados procedentes de Venezuela que demandaron estas axudas, aumentando, paralelamente, o número de galegos procedentes da Arxentina. En total, presentáronse a estas axudas galegos procedentes de 38 países de todos los continentes.

Por provincias, recibiron axudas extraordinarias para o retorno en 2020, 327 da Coruña, 235 de Pontevedra, 96 de Ourense e 51 de Lugo, sendo as grandes vilas as que recibiron maior número de solicitudes (115 en A Coruña, 62 en Santiago de Compostela, 16 en Ferrol, 29 en Lugo, 8 en Monforte de Lemos, 37 en Ourense, 9 en O Carballiño, 6 en Barbadás, 120 en Vigo, 21 en Pontevedra, 9 en Vilagarcía e 8 en Lalín).

A este programa da Xunta poden acollerse os galegos de nacemento, os seus cónxuxes ou persoas cunha unión análoga á conxugal e os descendentes das persoas galegas e nadas en Galicia que, residindo fóra de España, se estableceran na Comunidade Autónoma galega.

O secretario xeral da Emigración recordou que no eido do retorno, en 2019 volveron a Galicia 6.574 galegos, convertendo a Galicia na comunidade autónoma con maior índice de retorno sobre as persoas que entran no país. “A estas cifras de retorno habería que engadirlle os familiares sen nacionalidade española que acompañan aos galegos retornados, e que son recollidos como inmigrantes nas estatísticas”, explicou.