A conselleira de Infraestruturas e Mobilidade, Ethel Vázquez, co delegado territorial da Xunta en Ourense, Gabriel Alén, supervisou hoxe o treito da estrada OU-105, no que comezarán os traballos a finais da primavera
A Xunta licita por case 950.000 euros as obras na estrada OU-105 no entorno do tanatorio de Ourense que completan a mellora da seguridade viaria e da mobilidade en Seixalbo
Ethel Vázquez concreta que as empresas teñen ata o vindeiro 1 de febreiro para presentar as ofertas para as obras, que teñen un prazo de execución de 8 meses e o obxectivo é telas rematadas a principios de 2022
Destaca a magnitude da intervención, que suporá un investimento de preto de 1 millón de euros, coas expropiacións e servizos afectados, para actuar en 350 metros
Executarase unha nova glorieta para o acceso á rúa Canizo e mellorarase o acceso ao tanatorio, con carril central de espera para favorecer os xiros á esquerda
Disporase una senda na marxe dereita desta rúa ata a súa conexión coa OU-105, habilitaranse beirarrúas e melloraranse os pasos de peóns e as paradas de autobús
Estes traballos súmanse aos xa realizados en 2019 entre a zona do tanatorio e O Cumial, que supoñen un investimento conxunto da Xunta de 1,8 millóns de euros
Salienta que as obras que a Xunta ten en execución ou licitadas na cidade, como a mellora de Marcelo Macías, a 2ª fase da Ponte Romana, a nova estación de autobuses intermodal ou a demolición da vella terminal, suman un investimento de 13 M€
A conselleira de Infraestruturas e Mobilidade, Ethel Vázquez, anunciou hoxe a licitación por case 950.000 euros das obras na estrada autonómica OU-105, na contorna do tanatorio de Ourense, que completan a mellora da seguridade viaria e da mobilidade en Seixalbo.
Durante a visita que realizou esta mañá ao lugar onde se levará a cabo esta nova actuación, acompañada do delegado territorial da Xunta en Ourense, Gabriel Alén, a titular de Infraestruturas da Xunta detallou que a Plataforma de Contratos Públicos de Galicia publica hoxe a licitación dos traballos e que as empresas teñen de prazo ata o vindeiro 1 de febreiro para presentar as súas ofertas.
A partir de aí, explicou, realizaranse os trámites administrativos necesarios co obxectivo de iniciar as obras a finais de primavera e telas rematadas a principios de 2022, xa que contan cun prazo de execución de 8 meses.
Magnitude da obra: case 1 millón de euros para actuar en 350 metros
A intervención ten por obxectivo completar a reforma integral da OU-105 en Seixalbo con novos traballos que consistirán na reordenación da sección transversal da estrada para optimizar a circulación dos peóns e do tráfico rodado, actuando nun treito de 350 metros de lonxitude.
Precisamente a conselleira de Infraestruturas e Mobilidade destacou a “magnitude da intervención”, xa que suporá un investimento de preto de 1 millón de euros, concretamente 975.000 euros, coas expropiacións e servizos afectados, para actuar nun treito de 350 metros.
Executarase unha nova glorieta de 36 metros de diámetro para o acceso á rúa Canizo e tamén se mellorará o acceso ao tanatorio por esa mesma rúa, con carril central de espera para favorecer os xiros á esquerda. Ademais, a rúa Canizo deixarase de sentido único desde o seu inicio ata o tanatorio e de dobre sentido desde o acceso ao tanatorio á nova glorieta.
Ethel Vázquez explicou que os traballos tamén incidirán na mellora da mobilidade, tanto dos vehículos, coma dos peóns. Para iso mellorarase a mobilidade na entrada e saída da rúa Canizo; disporase unha senda na marxe dereita desta rúa ata a súa conexión coa estrada autonómica e habilitaranse beirarrúas, adaptando os pasos de peóns para que sexan accesibles. Ademais, disporase un paso de peóns con iluminación específica e regulación semafórica para dar continuidade aos percorridos peonís e poder acceder á parada de autobuses en dirección a Ourense, ademais de dúas paradas de autobús asociadas aos pasos de peóns.
Os traballos completaranse coa mellora dos firmes e pavimentos, xunto co alumeado, saneamento e drenaxe, sinalización e balizamento en todo o treito da actuación.
Ethel Vázquez lembrou a intervención xa realizada o ano pasado nun treito de 1,5 quilómetros, entre a zona do tanatorio e O Cumial, na que se executou unha nova glorieta no acceso principal a Seixalbo; se eliminou o terceiro carril para calmar o tráfico e para poder dispoñer dese espazo para carrís centrais e aparcadoiros; se melloraron os pasos de peóns e instaláronse novas marquesiñas para as paradas de bus; se actuou nas beirarrúas e habilitáronse sendas en ambas as marxes, no teito final, incidindo na traza do Camiño de Santiago.
Dúas actuacións de reforzo da seguridade viaria e mellora da mobilidade en Seixalbo que contan cun investimento autonómico conxunto de 1,8 millóns de euros e que, segundo salientou Ethel Vázquez, se veñen sumar a outras actuacións coas que a Xunta contribúe a facer cidade.
Citou, entre outras intervencións, a mellora da avenida Otero Pedrayo, xa realizada; a mellora da rúa Marcelo Macías, que estará rematada en primavera; ou a segunda fase de posta en valor da Ponte Romana, na contorna da capela dos Remedios, iniciada no mes de setembro.
Referiuse tamén á nova estación de autobuses da intermodal de Ourense, que pronto estará finalizada e para a que a Xunta xa ten adxudicada a explotación para os vindeiros cinco anos, e á demolición da vella terminal para liberar o espazo para a construción dunha residencia da terceira idade.
Ethel Vázquez salientou que as obras da Xunta na cidade, en execución ou licitadas, suman un investimento autonómico de 13 millóns de euros.
Imaxes relacionadas
