A Xunta adxudica por preto de 270.000 euros o servizo para a realización de inspeccións e xestión de noiros e muros da rede de estradas autonómicas nos próximos tres anos
O contrato terá unha vixencia inicial de 3 anos, coa posibilidade de prórroga durante 2 anos máis
O servizo permitirá ter información detallada, realizar inspeccións rutineiras ou especiais e acometer as actuacións preventivas necesarias para aumentar a vida útil das estruturas, garantir a funcionalidade das vías e reforzar a seguridade viaria
Os datos sobre os muros e noiros subiranse a unha nova aplicación informática, que se está a desenvolver en colaboración coa AMTEGA e que está xa a funcionar coa información e xestión sobre as pontes e obras de paso das vías autonómicas
Este programa, xunto co de seguridade e inspeccións das pontes e obras de paso que xa está en marcha, completará a xestión do risco nas estradas autonómicas
A Consellería de Infraestruturas e Mobilidade vén de adxudicar o servizo que levará a cabo o programa de inspección e xestión de muros e noiros existentes na rede de estradas autonómicas.
Este contrato, adxudicado á empresa Cimarq, Consultoría de Ingeniería, Medio Ambiente y Arquitectura, S.L. por algo máis de 268.000 euros terá unha vixencia de tres anos, coa posibilidade de ser prorrogado durante dous anos máis.
O programa permitirá ter unha radiografía completa de 600 muros e noiros situados nas estradas autonómicas, preseleccionados polos técnicos da Axencia Galega de Infraestruturas para o seguimento debido ao seu estado, altura ou outros parámetros como morfoloxía, xeoloxía ou contención.
A iniciativa contribuirá á anticipación na adopción das medidas necesarias ante un contexto de cambio climático no que cada vez son máis frecuentes os episodios de chuvias intensas ou o risco de inundacións, que poden afectar a estas estruturas.
Ademais farase un inventario con información detallada destas estruturas e programaranse actuacións rutineiras ou especiais, segundo o estado no que se atopen os muros e noiros analizados.
O contrato tamén recolle a posibilidade de informatizar e subir os datos inventariados a unha nova aplicación que se está a desenvolver en colaboración coa AMTEGA, e que está xa a funcionar coa información e xestión sobre as pontes e obras de paso das vías autonómicas.
A maiores, elaborarase unha guía propia cos métodos a seguir para realizar as inspeccións e actuar nos muros e noiros. Esta nova guía aglutinará todos os coñecementos, o resultado das inspeccións realizadas, as tipoloxías dos muros e noiros, o seguimento do seu estado e as solucións adoptadas para a súa mellor conservación.
Este programa, xunto co de seguridade e inspeccións das pontes e obras de paso que xa está en marcha, e coa nova aplicación informática, completará o sistema de xestión do risco nas estradas autonómicas.