Román Rodríguez anuncia que a Xunta porá en marcha un Plan Director para o mantemento da Muralla de Lugo

O conselleiro de Cultura, Educación e Universidade, Román Rodríguez, realizou hoxe en Lugo unha andaina co gallo do 20 aniversario da declaración da Muralla romana como Patrimonio da Humanidade, un recoñecemento que a Unesco fixo público o 30 de novembro do ano 2000 poñendo de manifesto o valor deste ben que constitúe o mellor exemplo vivo de fortificacións militares do Imperio Romano tardío conservado en Europa.

Durante a súa visita a cidade de Lugo, o titular de Cultura e Educación, acompañado polo delegado territorial da Xunta en Lugo, Javier Arias, avanzou que a Xunta porá en marcha un Plan Director que establecerá as liñas de actuación en materia de conservación para os vindeiros anos. Neste sentido, explicou que os orzamentos do vindeiro ano recollen a redacción deste Plan.

Nesta liña, Román Rodríguez explicou que o valor e importancia deste monumento fixo que Lugo sempre ocupara un lugar destacado no compromiso do Goberno galego co patrimonio cultural. Proba disto é que a Administración autonómica investiu máis de 10 millóns de euros en máis de 60 actuacións vencelladas coa Muralla romana desde que foi recoñecida pola Unesco. A meirande parte destas intervencións foron de conservación, mantemento e consolidación.

Este compromiso, tal e como incidiu, “continúa vixente nos plans do Goberno galego para o vindeiro ano”. Así, ademais da redacción do Plan Director, a Xunta de Galicia ten previsto achegar máis dun millón de euros a actuacións vencelladas coa Muralla que se executarán ao longo do ano 2021. Algúns dos traballos que están previstos son a restauración dos lenzos dos cubos XXX e XXI e a mellora da planificación da conservación, mantemento e limpeza.

#ANosaMuralla

Co gallo desta efeméride, a Xunta de Galicia vén de poñer en marcha a campaña #ANosaMuralla, un proxecto que sitúa aos lucenses como protagonistas e, en parte, artífices de acadar e manter a distinción concedida pola Unesco no ano 2000. Para iso, a través da canle de Youtube A Nosa Muralla habilitada para a ocasión, estanse emitindo diferentes felicitacións polos vinte anos da Muralla como Patrimonio mundial da man de destacados personaxes de distintos ámbitos da sociedade lucense.

Todas aquelas persoas que queiran participar poderán subir os seus vídeos, cunha duración máxima dun minuto, a través da plataforma gratuíta anosamuralla.wetransfer.com, dun xeito sinxelo e rápido. Ademais de felicitacións, na canle tamén se están a emitir historias e as anécdotas doutros tantos personaxes, que son os que están aportando a súa visión particular desde o punto de vista deportivo, artístico, arqueolóxico, teatral, literario ou incluso máxico.

Distintos puntos de vista que chegan da man de lucenses coma Tito Concheiro, arqueólogo; o Mago Rafa; Xoán Guerreiro, pintor; Paloma Lugilde, directora teatral; Sergi e Erik Quintela, xogadores do CB Breogán ou Jimena Vázquez, gañadora do Premio Muralla Redacción 2018 e que escolleron un lugar do adarve, unha porta ou un recuncho especial para eles, cunha historia que comparten co resto dos lucenses e coa Muralla como protagonista.