A directora de Augas de Galicia, Teresa Gutiérrez, mantivo hoxe unha reunión co alcalde de Outes, Manuel González
A Xunta trasládalle ao Concello de Outes a disposición a cofinanciar as obras de mellora da depuradora
Augas de Galicia remitiralle ao Concello unha proposta de convenio de colaboración para axilizar a súa tramitación e avanzar no proxecto de saneamento
Trátase de reparar a planta coa fin de incrementar a eficiencia no seu funcionamento, o que suporá un orzamento duns 300.000 euros
A Xunta continúa achegando apoio técnico e financeiro aos concellos para que presten os servizos de saneamento e abastecemento, de competencia local
A directora de Augas de Galicia, Teresa Gutiérrez, trasladoulle ao alcalde de Outes, Manuel González, a disposición da Xunta a cofinanciar un terzo das obras de mellora da depuradora.
Teresa Gutiérrez mantivo hoxe un encontro co rexedor de Outes para abordar o impulso deste proxecto de saneamento.
A directora indicou que Augas de Galicia lle remitirá ao Concello unha proposta de convenio de colaboración para poder axilizar a súa tramitación e avanzar nas actuacións. A Administración local licitará e executará os traballos.
O proxecto construtivo, que está a ultimar o Concello, prevé un orzamento de 300.000 euros para acometer a reparación da planta coa fin de incrementar a eficiencia no seu funcionamento.
A Xunta continúa achegando apoio técnico e financeiro aos concellos para que poidan prestar aos veciños os servizos de saneamento e abastecemento, que son da súa competencia.