A Xunta remata as obras de mellora do firme na travesía do Pindo, no concello de Carnota
As condicións meteorolóxicas permitiron reducir a 12 días a execución desta obra, iniciada o 7 de outubro e cun prazo para realizala de 1 mes
A intervención, cun investimento de máis de 48.000 euros, permitiu rehabilitar o tramo da travesía da vía autonómica AC-550 con maior grado de desgaste e polo que discorrerá a Volta Ciclista a España
Actuouse no fresado parcial da capa de rodaxe e na extensión dunha nova capa en toda a superficie dos dous carrís
A Consellería de Infraestruturas e Mobilidade vén de rematar as obras de mellora do firme na estrada autonómica AC-550, no entorno da travesía do Pindo, no municipio de Carnota.
Esta actuación contou cun investimento autonómico de máis de 48.000 euros. As favorables condicións meteorolóxicas permitiron reducir a 12 días a execución dos traballos, que se iniciaban o pasado día 7 de outubro e que dispoñían dun prazo de execución de 1 mes.
A intervención enmárcase nas actuacións de conservación da rede viaria autonómica e centrouse na rehabilitación do firme do tramo da estrada que presentaba un maior grado de desgaste no entorno da travesía do Pindo, e polo que discorrerá proximamente a Volta Ciclista a España.
Os traballos, no tramo comprendido entre os puntos quilométricos 11+050 a 11+800, consistiron no fresado parcial da capa de rodaxe e na extensión dunha nova capa a base de formigón bituminoso en quente a toda a superficie dos dous carrís.
Imaxes relacionadas
