Política Social pon en valor espazos naturais de protección de aves no Concello do Grove cun campo de voluntariado para mozos

A directora xeral de Xuventude, Participación e Voluntariado, Cristina Pichel, visitou hoxe ao grupo de mozas e mozos que mañá sábado rematan a súa experiencia no campo de voluntariado A terra que habita o mar, iniciado o pasado día 1 deste mes de setembro. Este é o último campo de voluntariado desta tempada estival e a última actividade da Campaña de Verán deste ano 2020.

Durante este campo, rapaces e rapaces de entre os 18 e 30 anos de idade, puxeron en valor zonas de especial protección para as aves por ser lugar de parada nas migracións europeas e euroafricanas. Así, recuperaron estruturas de observación ornitolóxica, deseñaron e colocaron carteis interpretativos nestes lugares e tamén limparon especies de plantas invasoras.

Ademais, este campo de voluntariado incluíu un programa de actividades de ocio e tempo libre centradas, sobre todo, en deportes náuticos e de contacto coa natureza: piragüismo, bodyboard, mergullo de superficie ou sendeirismo, entre outras.

A Consellería de Política Social ofertou neste verán 348 prazas nun total de 29 campos de voluntariado (incluíndo as tres quendas de Cíes) para maiores de 18 anos por todo o territorio galego. Todas as actividades desta campaña seguiron as medidas de prevención fronte á covid-19 fixadas polas autoridades sanitarias co fin de garantir a seguridade de todas as persoas participantes.

En total, a Campaña de Verán deste ano, que leva por título O verán que necesitas, puxo á disposición da mocidade 6872 prazas en diferentes actividades e campamentos, que se prolongarán ata comezos do mes de setembro.