A directora de Augas de Galicia, Teresa Gutiérrez, participou hoxe nunha nova reunión con técnicos de Meteogalicia e da Consellería do Medio Rural para avaliar a evolución hidrolóxica
A Oficina Técnica da Seca mantén o estado de prealerta nas comarcas de Ortegal e da Mariña como medida preventiva ata a consolidación dos niveis dos ríos e encoros
As chuvias rexistradas en agosto permitiron que as bacías da Demarcación Hidrográfica Galicia-Costa acaden valores dentro da normalidade para este mes
Desde o mes de xullo está activa a situación de prealerta por posibilidade de seca hidrolóxica na comarca de Ortegal e na Mariña lucense
A prealerta é unha situación de aviso temperán para prepararse ante un eventual escenario de seca e implica o seguimento continuo dos caudais de ríos
Ante as previsións meteorolóxicas que sinalan a probable escaseza de precipitacións en setembro, a Oficina Técnica da Seca decidiu manter o nivel de seguimento actual
A Xunta recomenda realizar un consumo responsable da auga, evitando os usos prescindibles
A directora de Augas de Galicia, Teresa Gutiérrez, participou hoxe nunha nova reunión da Oficina Técnica da Seca, na que se decidiu o mantemento do estado de prealerta nas comarcas de Ortegal e da Mariña como medida preventiva ata a consolidación dos niveis dos ríos e encoros.
No encontro constatouse que as chuvias rexistradas en agosto permitiron que as bacías da Demarcación Hidrográfica Galicia-Costa acadaran valores considerados dentro da normalidade para este mes.
Non obstante, e ante as previsións meteorolóxicas que indican a probable escaseza de precipitacións en setembro, a Oficina Técnica da Seca decidiu manter activos os estados actuais na citada demarcación.
Esta entidade reunida hoxe está integrada por técnicos de Augas de Galicia, da Consellería do Medio Rural e de Meteogalicia, que volverán celebrar unha nova xuntanza nas próximas semanas para avaliar a situación e adoptar as medidas necesarias.
Augas de Galicia continúa coa realización dun seguimento continuo e exhaustivo da evolución da totalidade de encoros e ríos.
Cómpre lembrar que desde o mes de xullo está activa a situación de prealerta por posibilidade de seca hidrolóxica nas comarcas de Ortegal e da Mariña lucense.
A activación da prealerta realízase como aviso temperán para prepararse con suficiente antelación ante un eventual escenario de seca e implica un incremento do seguimento continuo dos caudais nos ríos nestas zonas.
A Xunta reitera o chamamento aos concellos e á cidadanía en xeral para que se leve a cabo un consumo responsable da auga e, de xeito especial, nas zonas nas que está activa a prealerta.