A Xunta destina 379.000 euros a 29 asociacións de veciños da provincia de Lugo para obras e equipamento en espazos comunitarios
O Goberno galego notificou esta semana ás entidades beneficiarias a resolución das axudas destinadas a asociacións veciñais, comunidades de usuarios de auga e organizacións de mulleres rurais
O orzamento da convocatoria deste ano ascende a 2,5 millóns de euros e permitirá realizar obras de mellora nos locais de case 200 entidades veciñais de toda Galicia ademais da compra de novos equipamentos para as súas actividades
A Xunta apoia a través destas axudas o fomento do movemento veciñal con actuacións que contribúan á mellora do benestar dos cidadáns
A Xunta vén de informar esta semana ás entidades beneficiarias da resolución da convocatoria de axudas para 2020 do Plan Específico de acción comunitaria destinado a asociacións de veciños, comunidades de usuarios de augas e asociacións de mulleres rurais.
As achegas do Goberno galego no marco desta orde supuxeron un investimento de 379.400 euros na provincia de Lugo para 29 entidades. O 83% do orzamento está destinado a obras e o resto á adquisición de equipamentos. Entre as primeiras figuran traídas de auga e sobre todo, acondicionamento de locais sociais para uso comunitario e das súas instalacións anexas.
No concello de Riotorto obtiveron apoios catro entidades veciñais; tres nos de Quiroga e Lugo, e dúas no Incio e Vilalba. Tamén se financiaron proxectos asociativos nos concellos de Baleira, Castro de Rei, Castroverde, Cospeito, Friol, Guntín, Láncara, Mondoñedo, Outeiro de Rei, Pantón, A Pobra do Brollón, A Pontenova, Sarria, Sober e Xermade.
No conxunto de Galicia, a Administración autonómica destinará a 190 asociacións o orzamento de 2,5 millóns de euros reservado para as axudas deste exercicio, o que supón un incremento do investimento nun 70% respecto ao ano pasado.
As asociacións beneficiarias nesta orde poderán realizar a través destas subvencións obras de rehabilitación e acondicionamento nos seus locais e adquirir novos equipamentos cos que levar a cabo as súas actividades e a prestación de servizos aos veciños. Ademais, poderán mellorar o abastecemento de auga dalgúns núcleos .
A Xunta financia mediante as axudas deste plan actuacións que contribúan a satisfacer as necesidades e demandas da veciñanza e redunden na mellora do benestar dos cidadáns e da calidade de vida local. Desta forma, renova a súa aposta por fomentar o asociacionismo e a dinamización do movemento veciñal.
A contía deste ano con máis de 2,5 millóns de euros é a máis elevada xunto coa de 2016, cando se iniciou esta liña de subvencións. Neste período o Goberno galego leva investido no plan específico de acción comunitaria 10 millóns de euros.
Para as entidades veciñais e as organización de mulleres rurais, o plan conta cunha liña de subvencións para obras de mellora dos inmobles da súa titularidade ou sobre os que teñan dereito de uso; e outra para a compra de equipamentos. Pola súa banda, as comunidades de usuarios de auga poden obter axudas a través deste programa para a execución de obras de reparación e mellora de traídas veciñais de auga.