A Xunta executa traballos de conservación e limpeza nos treitos interurbanos do río Tambre, no Pino e en Frades
As tarefas están a desenvolverse nas contornas da praia fluvial A Presa e da área recreativa Os Pasos-Aiazo
As actuacións céntranse na retirada de árbores e de madeira morta na canle
Augas de Galicia mantén activas as actuacións para a mellora dos leitos fluviais e para favorecer as condicións naturais do ecosistema dos ríos
A Consellería de Infraestruturas e Mobilidade, a través de Augas de Galicia, está a executar os traballos de conservación e limpeza nos treitos interurbanos do río Tambre, nos concellos do Pino e Frades.
Estas tarefas lévanse a cabo na contorna da praia fluvial A Presa, nas parroquias de Ledoira e Pastor, e na zona da área recreativa Os Pasos-Aiazo, nas parroquias de Aiazo e Lardeiros, nos concellos do Pino e de Frades.
Os traballos consistirán na retirada de árbores caídas e madeira morta acumulada na canle do río.
Estas accións enmárcanse no programa de mantemento, conservación e mellora que realiza Augas de Galicia no dominio público hidráulico das bacías de Galicia-Costa, no ámbito territorial da zona Galicia-norte.
A Xunta de Galicia mantén así activas as actuacións para a mellora dos leitos fluviais e para favorecer as condicións naturais do ecosistema dos ríos.