O Estudo de seroprevalencia fronte ao COVID-19 estima que en Galicia estaría inmunizada o 1,15% da poboación
A Consellería de Sanidade presentou esta mañá os resultados da primeira onda do Estudo de seroprevalencia fronte ao COVID-19 na que participaron 44.832 persoas
Ourense é a provincia cunha maior prevalencia de inmunes, seguida de Pontevedra e Lugo, sendo A Coruña a que presenta un valor máis baixo
A porcentaxe de inmunes é maior a medida que aumenta a idade
Arredor de 30.000 persoas están inmunizadas fronte ao COVID-19 en Galicia, o que supón un 1,15% da poboación. Estas son algunhas das conclusións do Estudo de seroprevalencia fronte ao COVID-19 que está realizando o Sergas e que se presentou esta mañá en rolda de prensa.
Da base de datos de tarxeta sanitaria, por mostraxe aleatoria simple, seleccionouse unha mostra, estratificada en seis estratos, definidos polo sexo e os tres grupos de idade de 0 a 18, de 19 a 64 e 65 a máis anos, para cada un dos sete concellos con maior poboación de Galicia e para outras 38 comarcas ou agrupacións de comarcas. En total son 45 mostras independentes.
Polo de agora levouse a cabo a primeira das fases do estudo. Para realizala, contactouse con 61.836 persoas seleccionadas de xeito aleatorio polo Instituto Galego de Estatística, das que 44.832, o 72,5%, realizaron o test. Delas, 385 deron resultado positivo.
Por territorios, a provincia coa maior prevalencia, é dicir, a proporción de xente que sería positiva dado o resultado da proba, é Ourense. Os datos indican que o 1,88% da poboación da provincia, isto é 5.609 persoas, estarían inmunizadas. En Ourense realizáronse un total de 6.983 probas, das que 94 arroxaron resultados positivos.
Datos da mostra | Estimación na poboación | |||
Total | Positivos | Porcentaxe | Número | |
Provincia | ||||
A Coruña | 15.823 | 91 | 0,77 | 8.436 |
Lugo | 7.327 | 45 | 0,79 | 2.488 |
Ourense | 6.983 | 94 | 1,88 | 5.609 |
Pontevedra | 14.699 | 155 | 1,49 | 13.816 |
Área sanitaria | ||||
A Coruña-Cee | 7.142 | 32 | 0,62 | 3.397 |
Santiago-Barbanza | 7.117 | 55 | 1,02 | 4.513 |
Ferrol | 2.895 | 13 | 0,65 | 1.133 |
Lugo-A Mariña-Monforte | 7.327 | 45 | 0,79 | 2.488 |
Ourense-Verín-O Barco | 6.983 | 94 | 1,88 | 5.609 |
Pontevedra-O Salnés | 5.305 | 52 | 1,35 | 3.881 |
Vigo | 8.063 | 94 | 1,64 | 9.329 |
A prevalencia de inmunes aumenta coa idade, tanto en homes como en mulleres, pasando do 0,56% nos menores de 19 anos cun total de 2.196 persoas nese tramo de idade inmunizadas, ao 1,64% no grupo de 65 anos en diante, con 10.959 persoas con anticorpos.
Datos da mostra | Estimación na poboación | |||
Total | Positivos | Porcentaxe | Número | |
Homes e mulleres | ||||
0 a 18 anos | 6.525 | 28 | 0,56 | 2.196 |
19 a 64 anos | 26.422 | 216 | 1,09 | 17.194 |
65 anos e máis | 11.885 | 141 | 1,64 | 10.959 |
Todos | 44.832 | 385 | 1,15 | 30.349 |
Homes | ||||
0 a 18 anos | 3.365 | 13 | 0,52 | 1.035 |
19 a 64 anos | 12.684 | 86 | 0,93 | 7.250 |
65 anos e máis | 5.134 | 62 | 1,68 | 4.811 |
Todos | 21.183 | 161 | 1,03 | 13.096 |
Mulleres | ||||
0 a 18 anos | 3.160 | 15 | 0,61 | 1.161 |
19 a 64 anos | 13.738 | 130 | 1,25 | 9.945 |
65 anos e máis | 6.751 | 79 | 1,60 | 6.148 |
Todos | 23.649 | 224 | 1,26 | 17.254 |
Outra das conclusións do estudo é que a prevalencia de inmunes nas persoas que tiveron síntomas da enfermidade multiplica por catro á das persoas que non os tiveron (2,73% vs. 0,70%).
Con este estudo, a Consellería de Sanidade busca un triplo obxectivo: estimar a prevalencia da inmunidade fronte ao COVID-19 nas diferentes localidades galegas, definir cal é a súa repercusión de acordo ás variables de sexo e idade, e, finalmente, monitorizar a evolución da epidemia durante o período de tempo en que se produza a recollida da información.
O estudo epidemiolóxico, unha vez finalizado, permitirá ter unha visión máis nítida e ampla do COVID-19 en Galicia, e incide en que esta investigación repercutirá dun xeito beneficioso en toda a poboación, particípese ou non na toma de datos. Os resultados do proxecto posibilitarán acadar un coñecemento profundo da epidemia do COVID-19, permitindo adoptar as medidas máis axeitadas; coñecer a súa incidencia de acordo as variables de sexo, idade, área territorial e, sobre todo, poder anticiparse perante a posibilidade de novos contaxios potenciais.