A conselleira de Infraestruturas e Mobilidade, Ethel Vázquez, xunto co alcalde, mantivo unha videoconferencia co equipo responsable das actuacións para supervisar o seu avance e as medidas de protección da saúde adoptadas por mor do COVID-19
A Xunta constata que o avance con seguridade nas obras do centro de saúde da Estrada, no que inviste 4,6 M€, permitirá que estea ao servizo dos veciños no verán
Os traballos progresan a bo ritmo e xa acadan o 75% da súa execución total
Este edificio de 3 andares albergará as consultas de medicina xeral, de enfermería, a área pediátrica ou de urxencias ou a sala de radiografía e de ecografía
O novo centro de saúde atenderá unha poboación con case 21.000 tarxetas sanitarias, das que arredor de 2.300 corresponden a atención pediátrica
Ethel Vázquez salienta que a continuación deste proxecto supón garantir 30 postos de traballo directos que están asociados á súa execución
A Xunta constata que o avance con seguridade nas obras do centro de saúde da Estrada, no que inviste 4,6 millóns de euros, permitirá que estea ao servizo dos veciños no verán.
A conselleira de Infraestruturas e Mobilidade, Ethel Vázquez, co director da Axencia Galega de Infraestruturas, Francisco Menéndez, mantivo hoxe unha videoconferencia co alcalde da Estrada, José López, e co equipo responsable do proxecto para avaliar a evolución dos traballos e as medidas de protección sanitaria adoptadas por mor do COVID-19.
As obras deste centro de saúde reiniciáronse a mediados de mes tras a súa interrupción polo cese xeral de actividades non esenciais. Neste sentido, no encontro constatouse que os traballos se están a realizar coas necesarias medidas para evitar contaxios.
No que se refire ao avance do proxecto, a conselleira concretou que as obras progresan a bo ritmo e xa acadan o 75 % da súa execución total.
Trátase dun novo centro de saúde, sobre unha parcela de máis de 4.000 m², que contará con 3 andares, ademais de soto, cuxo acceso principal se realizará a través dunha praza exterior. Tamén disporá dun acceso de ambulancias baixo teito.
O edificio albergará consultas de medicina xeral, de enfermería, matrona, área pediátrica, zona de urxencias, sala de toma de mostras, de radioloxía e ecografía, entre outros servizos.
Este novo centro de saúde atenderá unha poboación con case 21.000 tarxetas sanitarias, das que 2.300 corresponden a atención pediátrica.
Ethel Vázquez salientou que darlle continuidade a este proxecto supón manter activo investimento público da Xunta na Estrada e, desa forma, garantir os 30 postos de traballo directos que están asociados á execución desta actuación.
Subliñou a aposta pola sanidade pública que vén realizando a Xunta, que reactivou nas últimas semanas infraestruturas sanitarias cun investimento de 90 millóns de euros e autorizou a licitación da 1ª fase do Hospital de Montecelo, en Pontevedra, por 115 millóns.
Concretou que co levantamento das restricións se retomaron as obras nunha decena de centros de saúde como o da Estrada, Milladoiro, Narón, Bouzas, Pereiro de Aguiar, Melide, Salceda de Caselas, Paderne de Allariz ou o do Barrio da Residencia, en Lugo.
Ademais a conselleira salientou, xunto a estes centros de saúde, a reactivación das obras de reforma e ampliación dos hospitais da Costa e de Ferrol.