A Xunta aposta pola negociación colectiva para consolidar un mercado laboral baseado na igualdade
O vicepresidente primeiro e conselleiro de Presidencia, Xustiza e Deportes participou esta mañá na inauguración da ‘II Xornada Autonómica de Igualdade’ organizada polo CSIF Galicia
Diego Calvo sinalou a necesidade de incrementar a presenza de muller en todos os ámbitos, incluído o laboral, con medidas con perspectiva de xénero que permitan avanzar cara a unha sociedade máis xusta e igualitaria
Santiago de Compostela, 8 de febreiro de 2024
O vicepresidente primeiro e conselleiro de Presidencia, Xustiza e Deportes, Diego Calvo, inaugurou hoxe a II Xornada Autonómica de Igualdade, onde destacou a necesidade de que empresas, persoas traballadoras e administracións se impliquen nos desafíos da negociación colectiva co obxectivo de adaptarse ao novo paradigma laboral, de maneira que as relacións laborais estean baseadas na igualdade.
A segunda edición desta xornada organizada polo CSIF Galicia leva por lema Non podemos avanzar se a metade de nós queda atrás e céntrase precisamente nas medidas coas que fomentar a igualdade de xénero no diálogo social e na negociación colectiva.
Nesta liña, o vicepresidente primeiro incidiu na importancia da negociación colectiva para abordar as desigualdades salariais e condicións laborais e salientou que na contorna laboral actual marcada pola demanda dunha maior flexibilidade, este proceso ten o papel de “protexer os dereitos das persoas traballadoras, en especial, das mulleres”.
Na súa intervención, Diego Calvo resaltou que a anticipación aos desafíos actuais no eido das relacións laborais e a posta en marcha de propostas innovadoras require a colaboración de empresas e organizacións sindicais, tendo en conta que os axentes sociais son os “catalizadores” principais da voz das persoas traballadoras.
Un dos eixos do Plan de Igualdade é a saúde laboral e a prevención de riscos, “cun rexistro que recolla datos segregados por sexos”; mellorar e promover a formación en igualdade entre os empregados públicos así como deseñar unha guía de corresponsabilidade na Administración son outros dos retos do documento.
Imaxes relacionadas
