A directora xeral de Xuventude, Participación e Voluntariado, Cristina Pichel, estivo hoxe cos estudantes e docentes do centro que participan nesta iniciativa
A Xunta aplaude o traballo do alumnado do IES Fernando Blanco de Cee que participa no programa Correspondentes Xuvenís
Unha vintena de mozas e mozos do centro encárganse de informar aos seus compañeiros de actividades, axudas e iniciativas que son do seu interese
Cee (A Coruña), 6 de febreiro de 2024
A directora xeral de Xuventude, Participación e Voluntariado, Cristina Pichel, coñeceu hoxe de primeira man as actividades que se realizan no IES Fernando Blanco ao abeiro do programa Correspondentes Xuvenís da Xunta de Galicia. Unha vintena de estudantes de Formación Profesional Básica deste centro participan nesta iniciativa, que tamén conta co apoio de profesorado.
A proposta que os correspondentes deste instituto están a levar a cabo denomínase Acadix (Actividade, Convivencia, Aprendizaxe, Diversidade, Igualdade e Xénero). Ademais, este alumnado encárgase de informar aos seus compañeiros de programas, axudas e iniciativas no ámbito da xuventude que son do seu interese.
Cristina Pichel destacou que este programa axuda a potenciar as habilidades comunicativas e sociais dos estudantes, favorece que asuman responsabilidades e transmite valores como a colaboración ou o liderado. A xente moza que actúa como correspondente recoñécese a súa participación cun certificado de experiencias en educación non formal en materia de xuventude.
Imaxes relacionadas
