A Xunta organiza xornadas de portas abertas para que profesionais e público xeral poidan coñecer o novo matadoiro móbil
As quendas de visitas serán mañá, 6 de febreiro e o próximo día 14, de 8,30 a 14,30 horas no polígono industrial Os Acivros en Chantada
As persoas interesadas poderán solicitar máis información e anotarse no número de teléfono 982 251 201
O matadoiro xa está plenamente operativo e ten como fin mellorar a xestión e a rendibilidade das explotacións gandeiras de pequeno tamaño de zonas afastadas de grandes núcleos de poboación e situadas a distancia dos matadoiros convencionais
Santiago de Compostela, 5 de febreiro de 2024
Todas aquelas persoas interesadas en coñecer o novo matadoiro móbil impulsado pola Xunta de Galicia, tanto profesionais do sector como público xeral, poderán visitalo nas xornadas de portas abertas organizadas pola Consellería do Medio Rural.
A primeira quenda de visitas estará orientada a persoal profesional do eido gandeiro e terá lugar mañá, martes 6 de febreiro, no polígono industrial Os Acivros, localizado no concello lucense de Chantada. O mércores 14 de febreiro está programada outra xornada de portas abertas, nesta ocasión dirixida a público xeral que queira visitar as instalacións e coñecer a nova unidade móbil de sacrificio de Galicia.
O horario en ambas as dúas datas é 8,30 a 14,30 horas. O número de teléfono 982 251 201 xa está habilitado para poder consultar dúbidas e rexistrarse para a visita.
O matadoiro móbil
Os gandeiros interesados en facer uso do servizo do matadoiro móbil, que está operativo dende o 19 de xaneiro, poderán chamar ao mesmo número de teléfono (982 251 201) para encargar esta prestación.
Esta nova unidade de sacrificio matadoiro facilitará o sacrificio de ovellas, cabras e porcos -neste caso especialmente das explotacións de porco celta-, en zonas afastadas ou de montaña, optimizando así a xestión destas explotacións ao reducir os custos de transporte do gando e mellorando ao tempo a calidade da carne e o benestar animal.
Os prezos do servizo oscilan entre os 10 euros para animais ovinos e cabrúns menores dun ano (contabilizando só o sacrificio e a preparación do canal) ata os 50 euros para os porcos, no caso de incluír tamén o almacenamento e transporte a punto de distribución.
Imaxes relacionadas
