Vilagarcía de Arousa (Pontevedra), 2 de febreiro de 2024

A directora da Axencia Galega de Innovación, Patricia Argerey, e o delegado territorial da Xunta de Galicia en Pontevedra, Agustín Reguera, participaron esta mañá nunha xornada informativa de presentación das axudas á innovación para as pemes da provincia de Pontevedra, celebrada en colaboración coa Cámara de Comercio de Pontevedra, Vigo e Vilagarcía de Arousa.

O obxectivo desta xornada era dar a coñecer as novidades nos requisitos e características das novas convocatorias de axudas dirixidas a pemes así como os servizos de apoio que presta a Axencia, resolver dúbidas e propiciar un espazo de networking para o contacto entre centros e empresas. Ademais, aquelas pemes que o solicitaron participaron nun taller de asesoramento en materia de innovación.

Con esta xornada, que se está a celebrar nas catro provincias galegas, a Axencia Galega de Innovación quere animar ás micro, pequenas e medianas empresas e entidades do terceiro sector social a innovar, independentemente do seu tamaño, localización, ou sector. Para iso, ponse á súa disposición non só axudas económicas, senón apoios nun sentido máis amplo como asesoramento personalizado, xornadas e eventos formativos e divulgativos, axuda na preparación de propostas a programas europeos, xeración de contornas de colaboración, apoio a sectores estratéxicos emerxentes, vixilancia competitiva, apoio na busca de socios, difusión de convocatorias de axuda, plataforma de capacidades do ecosistema galego de I+Di e aceleradoras e incubadoras, entre outros.

En concreto, na xornada de hoxe presentáronse as convocatorias de Bonos de Innovación, Bonos para a preparación de candidaturas a programas europeos de I+D+i, DeseñaPeme e InnovaPeme.

Ademais, dúas entidades beneficiarias destes apoios presentaron a súa experiencia. Trátase das empresa arousás Craftium, beneficiaria da convocatoria DeseñaPeme 2023 e dedicada á intelixencia de mercado, e Tacore, beneficiaria de InnovaPeme 2021, e enfocada ao deseño e fabricación de equipamento para a industria procesadora de peixe e plantas de conserva.

A vindeira semana celebrarase a última destas xornadas de presentación de apoios: será en Ferrol o 6 de febreiro. As inscricións poden realizarse na web da Axencia Galega de Innovación.