Santiago de Compostela, 2 de febreiro de 2024

A Xunta e a asociación de traídas veciñais COXAPO veñen de asinar un convenio de colaboración para o fomento da transformación dixital das comunidades de usuarios e a formación dos seus membros.

A conselleira de Infraestruturas e Mobilidade, Ethel Vázquez, asinou este acordo co presidente da asociación COXAPO, Juan Joaquín Pousa Fernández. Esta asociación integra a máis de 200 comunidades de usuarios de 30 concellos.

No que se refire ás obrigas recollidas no acordo asinado, Augas de Galicia financiará esta iniciativa achegando máis de 23.300 €.

COXAPO integra a varias comunidades de usuarios co obxectivo do aproveitamento das augas procedentes de mananciais e a condución ata as vivendas ou parcelas de rega.

Neste sentido, o convenio asinado pretende formar aos membros das comunidades de usuarios para facilitar a xestión nos sistemas de abastecemento, que poden resultar complexas, e acadar unha maior eficiencia na prestación do servizo.

O persoal de Augas de Galicia colaborará no desenvolvemento de actividades de transformación dixital, formativas e divulgativas en materia de abastecemento da auga.

Esta formación favorecerá que a asociación optimice os resultados do traballo cun programa informático que permitirá controlar as referencias de subministro, visualizar os gastos e consumos de cada usuario ou ler os contadores a través dun dispositivo portátil.

Axudas para a mellora das traídas veciñais

A Xunta publicou a semana pasada no Diario Oficial de Galicia (DOG) a convocatoria de axudas para mellorar as instalacións das traídas veciñais, cun importe de 500.000 €. Os interesados poderán presentar as súas solicitudes ata o vindeiro 26 de febreiro.

Estas subvencións cubrirán as actuacións de mellora do estado das instalacións de captación, potabilización, almacenamento ou a colocación de dispositivos de medición de caudais das traídas que se realicen desde o 1 de xaneiro deste ano. Cabe citar a mellora nas arquetas de captación ou a protección dos pozos, a mellora dos sistemas de filtración e desinfección, a mellora dos depósitos de almacenamento ou a instalación de caudalímetros, entre outros.

O importe dos incentivos acadará o 80 % do investimento subvencionable, cun máximo de 15.000 € por solicitude. Un 65 % do crédito dispoñible resérvase para comunidades de usuarios de máis de 50 membros; e o outro 35 % restante, para comunidades de usuarios máis pequenas, de ata 50 membros.

Na actualidade, existen máis de 600.000 persoas en Galicia que empregan solucións autónomas para abastecerse, sexan veciñais ou individuais.