A Xunta presenta o proxecto colaborativo de emprendemento Cociña de ancares terras de burón

A secretaria xeral da Igualdade, Sandra Vázquez, e a directora xeral de Emprendemento e Apoio ao Emprego, Margarita Ardao, loaron o proxecto impulsado polo Polo de emprendemento da Fonsagrada e o GDR Montes e Vales Orientais
 

Puxeron en valor que esta iniciativa conxunta busca dar a coñecer os queixos, viños ou produtos cárnicos da zona -mesmo cunha tenda online-, así como o xeito de producir e os atractivos naturais ou históricos da contorna
 

No Polo da Fonsagrada téñense atendido máis de 60 persoas emprendedoras, con proxectos entre os que destacan os hostaleiros, seguidos dos referidos á agricultura ou gandaría

Navia de Suarna (Lugo), 17 de xaneiro de 2024

A secretaria xeral da Igualdade, Sandra Vázquez, e a directora xeral de Emprendemento e Apoio ao Emprego, Margarita Ardao, participaron hoxe na presentación do proxecto Cociña de Ancares Terras de Burón, impulsado polo Polo de emprendemento e apoio ao emprego da Fonsagrada en colaboración co grupo de desenvolvemento rural (GDR) Montes e Vales Orientais. Alí, puxeron en valor esta iniciativa colaborativa que busca dar a coñecer os produtos agroalimentarios da zona, xunto cos seus atractivos naturais ou históricos.

Na súa intervención, a secretaria xeral referiuse ao pulo do emprendemento feminino, especialmente nas contornas rurais onde se está a asentar de xeito decidido a Rede de polos de emprendemento e apoio ao emprego que conta na actualidade con 12 centros activos, incluído o da Fonsagrada do que parte a iniciativa presentada hoxe. Sinalou que o apoio da Xunta ás mulleres emprendedoras continuará neste 2024, con programas como o que cumprirá xa 28 anos dando impulso ao emprendemento e ao emprego feminino, así como ás iniciativas innovadoras e ás medidas de conciliación.
Pola súa banda, a directora xeral incidiu no asesoramento técnico -personalizado e de principio a fin dos proxectos- prestado desde os Polos, que está servindo para que medre o emprendemento en Galicia. Destacou que desde o centro da Fonsagrada xa se teñen atendido máis de 60 persoas emprendedoras, con iniciativas entre as que destacan as hostaleiras, seguidas das referidas á agricultura, a gandaría, a silvicultura ou a pesca. 

Cociña de Ancares Terras de Burón

No acto de hoxe, presentáronse os traballos realizados ata o momento no marco do proxecto de emprendemento Cociña de Ancares Terras de Burón, o estado da iniciativa e os próximos pasos a dar, como a habilitación dunha tenda online. Ao tempo, os produtores participantes no proxecto presentaron os seus produtos a distintos responsables de establecementos, facilitando así o contacto para acadar acordos de colaboración.

En concreto, os produtos que se buscan promocionar son a androlla, o butelo, os viños, os queixos ou os doces propios da zona, ademais da elaboración de platos nos que se combina a tradición e a innovación. Así mesmo, o proxecto contempla visitas a explotacións onde se crían os animais dos que proceden estes produtos, a panadarías tradicionais para ver como traballan, facer sendeirismo pola montaña ou descubrir o patrimonio natural e histórico da contorna. 
Emprego
Departamento:
C. de Emprego, Comercio e Emigración
Data de actualización: 17/01/2024

Novas relacionadas

Aneiros defende o éxito de programas mixtos de formación e emprego durante unha visita ao alumnado do obradoiro de garantía xuvenil’ Inicia VII’

A Xunta informa das vantaxes do Bono remuda para garantir o mantemento dos negocios como dinamizadores do territorio e xeradores de riqueza

A Xunta destaca as oportunidades laborais da primeira promoción de expertos en elaboración e negociación de plans de igualdade da Universidade da Coruña