A conselleira de Infraestruturas e Mobilidade, Ethel Vázquez, mantivo un encontro de traballo coa Asociación de Veciños de San Xoán, atendendo a solicitude de reunión traslada pola entidade
A Xunta inicia as obras do aparcadoiro disuasorio de San Xoán, en Ferrol, nas que inviste máis de 780.000 euros
Trátase da execución do novo estacionamento para o fomento de vehículo compartido que se sitúa nun lugar estratéxico de entrada e saída da cidade, ao carón da glorieta que comunica o comezo do núcleo urbano de Ferrol coa FE-13
O obxectivo da Xunta de iniciar as obras o pasado ano viuse demorado pola falta de resposta ás reiteradas solicitudes das preceptivas autorizacións de Estradas do Estado e tamén de Adif, entidade esta última que non remitiu a autorización ata o 10 de xaneiro
Os traballos iniciados no día de hoxe teñen un prazo de execución de 6 meses, polo que a previsión é que o aparcadoiro disuasorio de San Xoán estea en servizo este verán
O aparcadoiro terá máis de 2.800 m², disporá dun total de 87 prazas de estacionamento, 3 delas para mobilidade reducida e 3 con preinstalación de puntos de recarga de vehículos eléctricos
Respondendo á petición dos veciños, disporanse 2 marquesiñas nas dúas marxes da rúa Souto, para facilitar a accesibilidade ao transporte público
Ferrol, 17 de xaneiro de 2024
A Xunta iniciou hoxe as obras do aparcadoiro disuasorio de San Xoán, en Ferrol, nas que inviste máis de 780.000 euros.
Así o trasladou a conselleira de Infraestruturas e Mobilidade, Ethel Vázquez, no encontro de traballo mantido hoxe coa Asociación de Veciños San Xoán-Bertón na sede da entidade, no que tamén estivo o alcalde Ferrol, José Manuel Rey.
Segundo explicou a conselleira, a intención da Xunta era poder iniciar as obras o pasado ano, toda vez que foron licitadas no mes de marzo, adxudicadas en xuño e completados os actos expropiatorios a comezos de outubro.
Ante a falta de resposta dos organismos estatais de Estradas e Adif, a Xunta solicitou aos organismos correspondentes esas autorizacións no mes de agosto e reiteráronse, novamente, en novembro, non tendo recibido ata o 10 de xaneiro a última autorización necesaria para poder iniciar as obras, neste caso, por parte de Adif. Estradas do Estado resolveu a autorización favorable a finais de novembro.
Os traballos teñen un prazo de execución de 6 meses, polo que a previsión da Xunta é que o aparcadoiro disuasorio de San Xoán, en Ferrol, estea operativo e en servizo neste mesmo verán.
No que se refire ás características do aparcadoiro en execución, o novo estacionamento terá máis de 2.800 m², ofrecendo un espazo de estacionamento que permitirá reducir a circulación de coches polas rúas máis céntricas da cidade.
Xa no detalle, disporá dun total de 87 prazas cun ancho de 4,80 metros, 3 delas reservadas para vehículos adaptados a persoas con mobilidade reducida; e 3 con preinstalación para a recarga de vehículos eléctricos.
Terá un viario de circulación perimetral de 3 metros, máis 1 metro destinado á manobra de vehículos e á circulación dos peóns.
O viario de acceso será de dobre sentido, de entrada e saída, que se fará a través da glorieta existente na rúa Souto.
Tamén haberá un acceso exclusivo para viandantes que conectará coa avenida Mestre García Niebla, ademais de beirarrúas, co fin de reforzar a seguridade dos peóns.
Ademais, atendendo á petición dos veciños, disporanse 2 marquesiñas en nas dúas marxes da rúa Souto, para facilitar a accesibilidade ao transporte público.
Esta actuación forma parte dos proxectos promovidos pola Xunta ao abeiro dos fondos europeos do Mecanismo de Recuperación e Resiliencia Next Generation UE.