A directora xeral de Ordenación e innovación educativa, Judith Fernández, e a presidenta de Executivas de Galicia, Carla Reyes Uschinsky, asistiron hoxe a unha sesión do programa EduReferentes no Instituto IES Río Cabe de Monforte de Lemos. Esta iniciativa, impulsada pola Consellería de Cultura, Educación, FP e Universidades e Executivas de Galicia, pretende achegar ás aulas testemuños de mulleres galegas referentes que destacan pola súa traxectoria profesional de éxito en ámbitos con reducida representación feminina. O obxectivo é promover así a igualdade de oportunidades e favorecer que as nenas elixan o seu itinerario académico baseándose na súa vocación e non nos estereotipos de xénero.

Ao abeiro do programa, o alumnado de ESO do centro monfortino puido coñecer de primeira man a traxectoria de Mariví Iglesias Castelo, consultora financeira que traballa actualmente en OVB Allfinanz España S.A., e Isabel Aguirre Urca, arquitecta na Escola Galega da Paixase na Fundación Juana de Vega. Así mesmo, os estudantes participaron nun obradoiro impartido por Susana Pérez Crespo, consultora e formadora experta en intelixencia emocional.

En total, un total de 20 centros de ESO ou FP Básica forman parte este curso de EduReferentes, grazas ao que acollen charlas a cargo de dúas profesionais de diferentes sectores para traballar co alumnado os mitos sobre os diversos perfís desde unha perspectiva de xénero. Así mesmo, desenvólvense obradoiros sobre cuestións como a escoita activa, o traballo en equipo ou a creatividade.

O programa de actividades complétase coas mentorías individualizadas, para o que os centros participantes fan unha selección de cinco alumnos que son acompañados polas profesionais. As mentoras comparten a súa experiencia e coñecementos, apoiando aos estudantes na busca das súas fortalezas, habilidades e intereses.

A relación de centros incluídos no programa no curso 2023/24 é a recollida na seguinte táboa e pode consultarse tamén a resolución definitiva no Portal Educativo.