Santiago de Compostela, 13 de xaneiro de 2024

A Xunta convocou o curso selectivo para o acceso á categoría de policía, na escala básica dos corpos de policía local, correspondente á decimo sexta promoción. Tal e como recolle o Diario Oficial de Galicia, a acción formativa desenvolverase na Academia Galega de Seguridade pública (Agasp) do 1 de febreiro ao 11 de outubro coa participación de máis dun cento de aspirantes. Inclúe ademais un período de prácticas de xuño a setembro nos concellos de procedencia do alumnado. 

O obxectivo é dotar os axentes dunha formación teórico-práctica de carácter inicial, específica para as funcións propias dos corpos de policía local, e facilitarlles a competencia e capacidade necesarias para o desempeño da súa actividade profesional. 

Así, nas sesións, que se impartirán mañá e tarde en réxime de internado, abordaranse os módulos xurídico, operativo, asistencial, técnico, social-humanístico e de formación física, así como de policía de tráfico, administrativa, e xudicial e de investigación. A duración do curso é de 1.400 horas lectivas, 900 delas na Agasp e 500 de prácticas nos respectivos concellos.  

A iniciativa diríxese ás persoas que superaron os procesos selectivos da categoría de policía nos diferentes concellos de Galicia para que, unha vez realizado, sexan nomeadas persoal funcionario en prácticas. As solicitudes de inscrición deben ser remitidas polas administracións locais a través dun escrito á Agasp para a reserva das correspondentes prazas.