A conselleira de Economía, Industria e Innovación, María Jesús Lorenzana, mantivo hoxe un encontro co comité de empresa de Ferroglobe no que lles trasladou as diferentes medidas de apoio á industria electrointensiva que promove a Administración autonómica.

Na reunión, na que se lembrou a necesidade de que o Estado fixe un marco enerxético estable que apoie a produción deste tipo de compañías e que evite a súa deslocalización, a conselleira informou do estado de tramitación dos diferentes parques eólicos que teñen firmados contratos a longo prazo (PPAS) para subministrar enerxía renovable a esta compañía, abaratando así os seus custos enerxéticos. A través da Lei de áreas empresariais de Galicia promoveuse dar prioridade aos proxectos eólicos que destinen o 50% da enerxía que produzan á industria asentada en Galicia a través de contratos a longo prazo (PPA).

Por outra banda, os representantes dos traballadores tamén solicitaron o apoio da Administración autonómica para avanzar en diferentes proxectos, entre outros, a través do Perte de descarbonización.