Narón (A Coruña), 20 de decembro de 2023

A delegada territorial da Xunta en Ferrol, Martina Aneiros, achegouse esta mañá ao estadio de Río Seco, en Narón, onde participou na entrega de premios na fase local do circuíto de cross escolar, puntuable para o campionato provincial de centros educativos. A proba desenvólvese ao abeiro do programa Xogade (Xogos Deportivos Galegos en Idade Escolar) para o curso 2023/2024 que promove a Secretaría Xeral para o Deporte.

A representante da Xunta felicitou aos máis de 350 de rapaces participantes (dos centros educativos CPI As Mirandas, de Ares; CEIP Centieiras e CEIP O Ramo, de Fene, e o CEIP Ledicia, de Ferrol) e destacou a importancia da práctica deportiva nas categorías de base de cara a afianzar hábitos de vida saudables.

O programa Xogade agrupa toda a oferta deportiva e lúdica promovida pola Administración galega (escolar e federada) co obxectivo de levar a actividade a todos os concellos e brindarlle á rapazada a posibilidade de practicar e competir cos clubs e centros educativos de toda a comunidade galega. A de cross é unha das 17 modalidades convocadas dentro da actividade deportiva escolar de Xogade este curso xunto ás de atletismo en pista, bádminton, baloncesto, balonmán, duatlón, encontros multideportivos, fútbol sala, multixogo 6-8, natación, orientación, patinaxe artística, tenis de mesa, voleibol e voleibol sentado, xadrez e xogando co atletismo.

Aneiros aproveitou a ocasión para lembrar que, o 8 de xaneiro entrará en vigor o Bono Deporte que beneficiará a nenos e nenas de entre 6 e 16 anos federados nalgunha disciplina deportiva ou inscritos no programa Xogade con 120 euros para a adquisición e equipamento deportivo ou a realización de actividades deportivas. Os establecementos que desexen sumarse a esta iniciativa poden facelo a través da web bonodeporte.gal e teñen de prazo ata o 2 de xaneiro para facelo.